Feijóo non precisa de Vox para demoler as políticas de igualdade

Ás portas da campaña electoral que postulará Alberto Núñez Feijóo como candidato do PP á presidencia do Goberno do Estado en competencia con Pedro Sánchez, asistimos aos acordos e pactos de goberno do Partido Popular con Vox en concellos e comunidades autónomas sob a idea de que Vox imporá a súa axenda contra as políticas feministas. Neste discurso alentado polas forzas que conforman o actual Goberno do Estado (PSOE-Unidas Podemos) para tentar tirar rédito electoral do chamado a frear a extrema dereita, óbviase a axenda política do Partido Popular en materia de políticas de igualdade, facilitando que o partido que lidera Núñez Feijóo defenda un compromiso inexistente coa igualdade e escude e xustifique nos pactos e acordos de goberno con Vox a desaparición das mesmas. Hai apenas uns días escoitamos a Núñez Feijóo no programa de máxima audiencia El Hormiguero anunciar que se é presidente do Goberno do Estado terá unha vicepresidenta e Igualdade dependerá directamente del e engadía que no seu paso polo Goberno da Xunta da Galiza "lexislou sempre para loitar contra a violencia machista" e non será diferente de chegar ao poder. Cancelación A realidade e os datos do paso de Feijóo pola presidencia da Xunta amosan unha política completamente oposta ao que hoxe di defender, baseada no desmantelamento progresivo e sistemático das políticas de igualdade existentes e na ausencia de avances en materia de dereitos das mulleres e os colectivos LGBT. Coa chegada do PP con Feijóo á fronte en 2009 ao Goberno galego, comeza o desmantelamento dos avances en materia de igualdade, a empezar pola conformación dun Executivo non paritario, coas mulleres afastadas das áreas de maior peso político. Outra das primeiras decisións do Goberno de Feijóo en igualdade foi a eliminación do Servizo Galego de Igualdade e das oficinas de I+B achacando a existencia deste organismo autónomo adscrito á Secretaría Xeral de Igualdade a un "dispendio de cartos". En 2011 Feijóo aprobou a chamada Lei de apoio á familia e a convivencia en Galiza que, contestada con mobilizacións polo movemento feminista galego, co Plan integral de apoio a mulleres Embarazada, consagrou por lei o financiamento de organizacións relixiosas e colectivos contrarios aos dereitos das mulleres (antiabortistas) e un modelo de políticas públicas baseadas nos roles heteropatriarcais e na promoción da maternidade cunha forte pegada conservadora. Nos anos seguintes o Goberno da Xunta liderado por Feijóo eliminou todo tipo de programas dirixidos á conciliación como o Preescolar na Casa, reduciu á metade as axudas por fillas menores de 3 anos, cancelou a posta en marcha do programa Kanguros e duplicou as taxas de comedores escolares e escolas infantís. Hoxe as escolas infantís de 0 a 3 anos son gratuítas na Galiza mais á custa de recortar e eliminar todos os demais servizos existentes para a conciliación e o coidado das fillas. Compromiso nulo En materia de saúde das mulleres os retrocesos foron visíbeis a través da Lei de Familia que interfería na libre decisión das mulleres a interromper o embarazo financiando todo tipo de entidades antiabortistas e coa eliminación dos plans de saúde de Atención a Mulleres. En relación ao mundo laboral o primeiro impacto foi paralizar o Plan galego de emprego feminino contemplado na Lei 2/2007 sen iniciar ningún tipo de política específica en materia de emprego. Tamén en materia LGBT o paso de Feijóo pola Xunta da Galiza supuxo o desmantelamento dos centros Quérote tal e como estaban concibidos, a aprobación dun decreto para que sexan os CIM (Centros de Información á Muller) quen atendan o colectivo sen aumentar recursos e persoal e sen proporcionar a formación necesaria e a eliminación do programa Entendo que daba resposta xurídica, médica e psicolóxica ao colectivo LGBT. As políticas da Xunta entre 2009 e 2022 en materia de violencia de xénero con Feijóo na presidecia son inexistentes alén de anuncios e propaganda. O compromiso coa promoción das políticas de igualdade é nulo, como amosa a situación do selo da Xunta creado en 2009 para identificar as empresas que se comprometen coa igualdade, que tras 14 anos apenas conta con cinco entidades adscritas. O mesmo Feijóo que anuncia que Igualdade dependerá del en caso de chegar ao Goberno do Estado desmantelaba e reducía nun 377% os programas destinados a accións para a igualdade, protección e promoción das mulleres coa súa chegada ao Goberno da Xunta de Galiza.