As farmacias certificarán tests de antíxenos negativos para acceder a bares e discotecas

Xunta e colexios farmacéuticos veñen de asinar un convenio que outorgará carácter homologado polo Servizo Galego de Saúde aos test de antíxenos que se poden adquirir nas boticas, sempre que a proba autodiagnóstica se realice ante un responsábel farmacia que se encargará de expedir o certificado en cuestión se o resultado é negativo.

Fontes de colexios farmacéuticos galegos concretaron que, tras ofrecer test de saliva e certificados de vacinación, avanzouse no obxectivo de dispensar tests de antíxenos sen receita, por un prezo de entre 7 e 10 euros, co fin de facilitar a entrada en bares, restaurantes e discotecas da Galiza.

Poboación diana

Agora, poderán certificar e darlle validez a unha proba negativa. A poboación diana deste novo acordo comprende as persoas con idades de entre 13 e 35 anos, é dicir, quen aínda non teñen a pauta completa de vacinación. Cada usuario terá acceso a catro probas e será preciso ser paciente do Sergas.

En canto ao procedemento, que realizarán as farmacias que se adhiran ao convenio de forma voluntaria, requirirá un consentimento por parte do usuario ou dous pais naqueles casos nos que sexa preciso.

Proba na farmacia

O proceso será sinxelo. O usuario chegará a unha farmacia e pedirá o test. Un responsábel da botica supervisará que o autodiagnóstico se realiza de forma correcta e, non caso de que o resultado sexa negativo, poderá expedir o certificado acreditativo.

Se é positivo en Covid-19, a propia farmacia dará traslado ao Sergas e a persoa diagnosticada terá que illarse de inmediato á espera de ratificar mediante unha proba PCR a infección activa.

O usuario non abonará ningún outro pago polo certificado, segundo as fontes consultadas, á marxe do custo do propio test.