Familiares de residentes no centro DomusVi de Cangas protestan pola atención na pandemia
Unha vintena de persoas secundaron a convocatoria da asociación Vellez Digna para denunciar a falta de persoal e reclamar á Xunta que actúe na residencia.
"Pasados dous meses, DomusVi segue sen persoal, despois de todo o que pasou. Segue sen contratar, non hai enfermeiras para cubrir 24 horas nin a atención nocturna", denunciou o presidente da plataforma, Francisco Xosé Bernárdez Solla, quen lembrou que nesta residencia chegou a haber máis dun centenar de persoas contaxiadas de coronavirus, e polo menos unha vintena faleceron nestas instalacións.
"Non podemos admitir esta falta de atención para as nosas familiares. Segue sen haber enfermeiras e agora seguirán tendo que ser as auxiliares e as xerocultoras as que se ocupen da atención sanitaria", censurou o presidente de Vellez Digna, quen salientou que os protocolos polo brote epidémico "ralentizan o traballo". "Non se poden cumprir con escaseza de persoal", subliñou.
A plataforma pregúntase cantas persoas faleceron neste centro da terdeira idade, toda vez que a Xunta -sinalou o portavoz- fala de 22 decesos, "pero faltan 37 persoas". "Queremos que se nos diga a verdade, e queremos saber por que morreron estas persoas cando había sitio na UCI. Tiñan que terlles dado a oportunidade de levalos ao hospital", censurou Bernárdez.
Na acción reivindicativa, na que as participantes portaban pancartas contra a precariedade da residencia e a inacción da Xunta, e na defensa dun trato digno ás persoas maiores, o presidente de Vellez Digna tamén reivindicou para as usuarias e usuarios "atencións despois deste confinamento". "Máis alá da propia enfermidade: hai consecuencias mentais por este tempo de confinamento", remarcou.