Familiares da galega desaparecida no barco do CSIC exixen saber "que pasou"
Familiares da galega desaparecida no barco do Consello Superior de Investigacións Científicas (CSIC) insistiron en coñecer "que pasou" no buque, xa que subliñan que Carmen Fernández, natural de Cangas (comarca do Morrazo), "estaba animada" e "tiña gañas de embarcar".
Así o sinalou o portavoz da familia, o avogado Diego Leis, quen explicou que a hipótese con máis indicios é que a muller decidise acabar coa súa vida, aínda que "non se desbotan outros supostos", subliñou.
Por iso, indicou que, en caso de concluírse como suicidio, a familia espera coñecer que circunstancias se deron no buque para que a galega decidise facelo.
"Unha vez no mar non sabemos que foi o que lle puido levar a esa decisión. Ela estaba ben", engadiu Leis, quen destacou a importancia de que avance a investigación da Garda Civil para saber máis do ocorrido.
Preguntado sobre a suposta nota de despedida que deixaría Fernández antes de desaparecer, o portavoz explicou que non se tratou dunha nota, senón que ela escribía nun diario como sentía cada xornada.
Segundo os investigadores, nalgunhas páxinas pódense interpretar certas frases de que podería haber algunha vontade de sacarse a vida. Ademais, fontes consultadas por Europa Press aseguran que a muller enviaría parte do contido deste diario ás súas familiares horas antes de desaparecer.
Denuncia por acoso sexual
Sobre se a muller compartía barco cun compañeiro ao cal denunciara hai cinco anos por acoso sexual (o caso arquivouse en 2019), o portavoz da familia asegurou que, a pesar de que si coincidiron antes de partir, pola información que ela mesma trasladou aos seus familiares o home non se atopaba no buque. Con todo, Leis deixou claro que esta información non está confirmada nin pola Garda Civil nin polo CSIC.
"Non sabemos canto tempo coincidiron, pero cando saíron a mar el xa non estaba no buque", insistiu o avogado, sempre segundo a información que a desaparecida trasladaba aos seus achegados. Segundo el, a súa familia non notou "nada raro" até un día antes da desaparición, polo que queren saber que motivou ese "cambio de ánimo tan pronunciado" en tan poucas horas.
Todo iso despois de que a muller, camareira no barco, desaparecese do buque o pasado sábado, polo que a principal hipótese apunta a que se tirou ao mar de forma voluntaria. Salvamento Marítimo recibiu sobre as 08:20 horas do domingo o aviso de que faltaba unha tripulante no buque oceanográfico García de Cid.