Falece unha persoa e outras dúas resultan feridas nun accidente en Arnoia

Unha persoa faleceu nun accidente en Arnoia (O Ribeiro) ao saír da vía e caer por un terraplén o vehículo no que viaxaba xunto a outras dúas persoas cando regresaban ao seu domicilio desde o centro de saúde. Unha das persoas implicadas saíu polo seu propio pé e unha terceira vítima tivo que ser excarcerada.

Fontes da Garda Civil e da Central de Atención ás Emerxencias informaron de que o sinistro tivo lugar contra as 11.30 horas desta terza feira, momento no que se recibiron varias chamadas alertando do accidente e das dificultades para abandonar o coche.

Así, foron mobilizados efectivos sanitarios, o helicóptero medicalizado do 061 con base en Ourense, que tomou terra no lugar do sinistro, o GES de Ribadavia e os Bombeiros do Carballiño. O accidente produciuse á altura do quilómetro 25 da OU-0215, a estrada que vai de Arnoia a Cartelle, na contorna da curva da Peneda.

Segundo informou a Garda Civil, os tres implicados no sinistro son veciños de Sande, en Cartelle. Viñan do punto de atención continuada (PAC) de realizar unhas curas.