Falece un mozo de 24 anos e o seu irmán, de 14, resulta ferido de gravidade tras un accidente en Noia
Un mozo de 24 anos faleceu e outro, o seu irmán, de 14, resultou ferido de gravidade tras unha saída de vía no municipio de Noia, segundo informa o servizo de emerxencias 112 no seu parte de incidencias.
Un equipo do Grupo de Intervención Psicolóxica en Catástrofes e Emerxencias desprazouse até o lugar para prestar axuda aos familiares do mozo falecido e do seu irmán, ferido de gravidade tras producirse o accidente.
O suceso ocorreu ás 22.15 da noite do domingo, hora na que o 112 recibiu a chamada dun particular alertando do suceso. No seu relato indicaba que un vehículo se saíra da vía en Carracido, na parroquia de Barro (Noia), e impactara contra outro estacionado. Os ocupantes do vehículo estaban atrapados e precisaban asistencia sanitaria urxente.
Os xestores do Centro Integrado de Atención ás Emerxencias-112 pasaron o aviso a Urxencias Sanitarias-061, aos Bombeiros de Boiro, aos membros do GES de Noia e aos axentes da Garda Civil. Unha vez no punto, os bombeiros confirmaron ao 112 o falecemento dun dos ocupantes e o traslado do outro, que se atopaba gravemente ferido. Ademais, as dúas vítimas tiveron que ser excarceradas.
Debido ás condicións deste sinistro, desde o 112 activáronse os protocolos necesarios para a disposición dos profesionais especializados na atención psicolóxica ante graves emerxencias e catástrofes.
Tras coñecerse a noticia, o Concello de Noia trasladou as súas condolencias á familia polo sucedido a ambos os mozos, veciños do municipio. A través de redes sociais mandou o seu "sentido pésame á familia nestes duros momentos" e declarou o loito oficial na localidade esta segunda feira.