Falece un home en Mos tras precipitarse por un terraplén coa súa cadeira de rodas

Un varón faleceu en Mos, na comarca de Vigo, tras precipitarse por un terraplén coa súa cadeira de rodas. Os membros do Grupo de Emerxencias Supramunicipal (GES) de Mos rescataron á persoa, que foi atendida polo persoal do Servizo de Urxencias Sanitarias da Galiza-061. Porén, malia os intentos, nada puideron facer por salvarlle a vida.

Cinco minutos despois das doce e media do mediodía deste sábado, un particular contactou co 112 Galiza para pedir axuda. Solicitaba asistencia sanitaria para un señor con discapacidade que ía en cadeira de rodas e que acababa de precipitarse por un terraplén, na baixada á Picota, en Tameiga, no municipio de Mos.

Desde o 112 Galiza avisouse ao persoal do Servizo de Urxencias Sanitarias da Galiza-061, que solicitou colaboración para poder rescatar ao varón. Até o lugar tamén acudiron os equipos do GES de Mos e da Policía Local. O persoal do 112 tamén informou dos feitos aos Bombeiros de Vigo. Con todo, unha vez rescatado e tras o intentos de reanimación, tan só se puido confirmar o pasamento do home.