A facturación da hostalaría cae 64,9% nun ano

As cifras que vén de presentar o Instituto Galego de Estatística (IGE) dan conta da situación do sector servizos na Galiza. Mentres no conxunto estatal a súa facturación diminuíu no último ano en 16,5%, no país reduciuse en 18,1%, cunha caída no volume de negocios só superada polo arquipélago canario e polas Illes Balears. Malia que os datos globais están condicionados polo comportamento do comercio por xunto, e máis concretamente polo peso no mesmo do complexo téxtil, cuxa produción se resente desde o comezo da pandemia, os números da hostalaría e do comercio retallista confirman as perspectivas adiantadas desde as entidades do sector. A contracción da facturación no sector servizos veu acompañada dunha alza do desemprego de 3,4%. Malia que neste aspecto a Galiza resistiu mellor no seu conxunto que o total estatal, onde a ocupación caeu en 4,6%, a hostalaría galega destruíu máis emprego que no resto do Estado. Así, entre xaneiro de 2020 e xaneiro de 2021, rexistrou un aumento do desemprego de 17%, unha porcentaxe superior en tres décimas á media estatal, que resulta, aínda, máis preocupante polas condicións específicas do modelo de negocio hostaleiro galego, cun número maioritario de estabelecementos de propiedade familiar e cun réxime de explotación menos intensivo en man de obra. O sector comercial liderou en 2020, por primeira vez na serie histórica, os concursos de acredores A hostalaría liderou a caída da facturación no sector servizos o pasado ano. Os datos divulgados polo IGE confirmaron unha baixada de ingresos nos negocios hostaleiros galegos de 64,9%, fronte a 60,1% do total estatal, o que significou unha diminución 4,8 puntos superior á media. A este respecto, os economistas consultados por Nós Diario consideran esta cifra moi preocupante, dada a menor dependencia do sector a respecto do turismo europeo e a súa ligazón co consumo doméstico. A Federación Galega de Empresas Inmobiliarias (Fegein) sinalou, a finais de febreiro, que 3.700 locais fecharan na Galiza entre a primeira e a terceira vaga. Nunha liña semellante, a Xunta da Galiza, no seu último informe de conxuntura turística, recolleu que en 2020 cesaron na súa actividade 900 hoteis e hostais, o que “supuxo unha caída de 32% na oferta dispoñíbel”. Ao tempo, as diversas informacións achegadas polos organismos públicos e as entidades representativas do sector coinciden en apuntar que a situación é cada día máis complicada. O comercio perde 23,2% dos ingresos A facturación no sector comercial caeu o 23,2% no pasado exercicio, superando Galiza a media estatal en 9,9 puntos. Deste modo, o comercio por xunto diminuíu na Galiza o 30%, a venda e reparación de vehículos de motor o 9,9% e o comercio ao retallo o 7,1%, destacando en relación con este último dato a caída do segmento do equipo persoal, onde se atopa o téxtil e o calzado, con 27,4%; outros bens, con 5,4%; e equipo de fogar, con 2,3%. Ao tempo, as grandes cadeas de distribución aumentaron a súa facturación en 2,7%, reducíndose nos negocios familiares en 17,1% e nas empresas unilocalizadas en 8,4%. A caída da ocupación no comercio situouse no último ano en 22%. Excepto nas grandes cadeas de alimentación, onde se incrementaron os cadros de persoal en 0,6%, a destrución de emprego foi constante no resto das áreas de actividade, encabezando a perda de postos de traballo os negocios familiares e as empresas unilocalizadas. Malia que a operativa de protección do emprego aprobada polo Estado cos expedientes de regulación de emprego (ERTE) limitou o número de concursos de acredores, en 2020 foi o comercio quen por primeira vez na serie histórica os liderou na Galiza, con 55 procedementos tramitados nos diferentes xulgados do mercantil. O presidente da Federación Galega do Comercio, José María Seixas, sinalou semanas atrás a Nós Diario que “entre o 20% e o 40%” dos comercios galegos se verán obrigados a fechar, debido á crise económica desatada pola pandemia. Malia que desde 2008 observouse unha caída da actividade, con 15.000 estabelecementos menos na actualidade e 5.000 empregos perdidos nos últimos cinco anos, o dirixente da entidade apuntou que “agora mesmo hai un 20% de fechamentos de comercios” e calcula que pode chegar a “40% a final de ano se non cambian as cousas”. Uns “datos moi preocupantes” O profesor da Universidade de Santiago (USC) Adrián Dios considera “os datos moi preocupantes” e apunta “a caída do consumo e o aumento do aforro como consecuencia da incerteza provocada pola situación económica”. Ao tempo, destaca a Nós Diario que “os estudos din que aqueles Estados que impuxeron as restricións máis duras á actividade económica e, por conseguinte, controlaron con antelación a pandemia, son os que antes se recuperaron economicamente. A China é un exemplo paradigmático disto e xa rematou 2020 medrando”. O economista e colaborador do suplemento "Producir" de Nós Diario Joam Romero destaca “a debilidade do sector servizos galego, concretamente aquel formado por negocios de autónomos e pemes”. “Son negocios de pequena dimensión, con grande atomización, con escasa capacidade para endebedarse, polo tanto, con menos músculo financeiro para soportar crises”, afirma Romero, quen lembra que “o comercio retallista opera con marxes de beneficio moi reducidas e cun nivel de endebedamento elevado”. O economista da USC Gonzalo Rodríguez afirma a Nós Diario que “nos servizos hai un sector refuxio moi forte. Eses sectores, formados en moitos casos por xente procedente doutra actividade, como acontece coa hostalaría e co pequeno comercio, son os que están sufrindo de verdade a crise”. En contraste, refírese ao comportamento do transporte, “unha actividade que fai parte tamén do sector de servizos pero cuxa facturación medra pola explosión dos negocios da mensaxaría, moi ligado ás grandes plataformas de venda dixital”. As cifras da economía galega, sen propaganda Malia a insistencia da Xunta da Galiza en subliñar un mellor comportamento da economía galega en relación coa media estatal, os economistas consultados por Nós Diario discrepan da pertinencia desa análise. A economista da Universidade de Santiago de Compostela María Cadaval considera, en declaracións a Nós Diario, que “non facemos ben en compararnos coa economía española porque as nosas estruturas produtivas son diferentes. Sería máis correcto facer unha comparativa con Europa que co Estado español, porque as europeas son economías máis semellante á nosa”. “Onde si que houbo unha caída moi importante da actividade é no sector primario, máis elevada que na media europea”, engade a profesora. “Se collemos as cousas ao peso, os números son mellores, pero se vemos a caída sector por sector, caemos”, continúa Cadaval, quen sinala que “caemos no primario e no secundario, en empresas con sectores de arrastre até o punto de que Galiza leva perdido un de cada cinco empregos industriais desde 2008”. Así, cuestiona os datos das exportacións, nomeadamente do automóbil, xa que “o destino non foi o consumidor final senón maioritariamente Francia, lugar onde Citroën centraliza as actividades intraindustria do grupo”. Adrián Dios afirma que “dicir que Galiza está mellor é unha análise optimista. Os nosos problemas son máis estruturais que a caída de arredor de 20% no sector servizos. A caída do peso do complexo industrial e de compañías con capacidade de arrastre é evidente. Como se usen os fondos Next Generatión será chave”. “Galiza non vai mellor polo baixo peso dos sectores avanzados na súa economía. Non pode ir mellor porque ten unha taxa máis reducida en actividades de alto valor”, destaca Gonzalo Rodríguez, quen liga “a capacidade de resistir do sector servizos ás axudas do círculo familiar”.