A Estratexia Galega de Mobilidade só reducirá en 10% as emisións de gases de invernadoiro nesta década
A Xunta só pretende reducir as emisións de gases causantes de cambio climático do transporte en 10% en 2030 con respecto aos niveis actuais.
A proposta da Estratexia Galega de Mobilidade (EGM) elaborada polo Goberno galego pretende reducir en 10% as emisións de gases de invernadoiro do transporte nunha década.
O obxectivo da alternativa formulada polas autoridades galegas aspira a retallar en 1,5ºC as emisións no sector que máis contribúe desde a Galiza a situación de emerxencia climática.
O Observatorio Galego da Acción Climática (OGACLI) considera pouca ambiciosa a medida defendida pola Xunta. Neste sentido, entende que a Estratexia Galega de Mobilidade “debería aspirar a lograr emisións cero en 2040, en lugar de en 2050”
OGACLI defende que “as emisións en 2030 xa deberían ser 50% inferiores ás de 2019”. Neste liña, lamenta que “o Goberno galego propón atrasar a redución drástica das emisións no sector do transporte”.
O colectivo lembra que “o transporte é o sector no que máis creceron as emisións desde 1990, ano de inicio da serie oficial de datos”. A este respecto, apunta que “depende en 94% de produtos petrolíferos e acapara un terzo da enerxía consumida na Galiza”.
O transporte consume máis enerxía que a suma de fogares e servizos. Segundo os últimos datos oficiais, o tráfico de persoas e mercadorías é a maior fonte de gases causantes de cambio climático na Galiza, representando 22,5% das emisións totais
OGACLI significa que “a descarbonización do transporte é o desafío climático máis complicado e require dun forte compromiso de todos os poderes públicos e da cidadanía”.
A entidade denuncia que a Xunta renuncia a facer a súa parte ao apostar por un modelo de mobilidade que non procura nin unha redución forte da necesidade de desprazamentos e das súas distancias”.