Estes son os nove tramos de risco das estradas galegas
As estradas máis seguras son aquelas polas que transitan máis vehículos por día.
As estradas galegas contan cun total de nove tramos con risco elevado de accidente. O peor deles está na N-525, estrada que une Santiago con Benavente. Son datos que recolle o informe EuroRAP 2022, que conta coa participación do Real Automóbil Club de España (RACE).
A Galiza é a cuarta comunidade con maior porcentaxe de estradas con risco elevado (10,8%), só por detrás de La Rioja, Catalunya e Asturias. En concreto, a comunidade galega conta 230,3 quilómetros de risco elevado entre un total 2.136,4 quilómetros que posúe a rede viaria galega.
Así, ademais do tramo na N-525, que é o de peor índice entre os considerados puntos "vermellos" (conta con 5 accidentes: con dous mortos e tres feridos graves entre 2019 e 2021), os outros oito puntos perigosos na Galiza inclúen un tramo da N-541. Nesta estrada tivo lugar o accidente de autobús da pasada Noiteboa na que faleceron 7 persoas. Tamén teñen tramos perigosos a N-640, a N-6, a N-532, a N-120 e a N-547.
Denominador común nas estradas de risco
O informe caracteriza as estradas máis perigosas por seren vías convencionais, posuír unha calzada única, ter interseccións ao mesmo nivel e unha intensidade media diaria por baixo dos 10.000 vehículos ao día. Pola contra, o informe EuroRAP 2022 estabelece que as estradas máis seguras son aquelas polas que transitan máis vehículos por día.
"Nelas prodúcense menos accidentes por cada coche que circula, non se invade o sentido contrario, non hai interseccións ao mesmo nivel e, ao dispoñer duns maiores niveis de seguridade pasiva, os accidentes teñen menores consecuencias", explicou o RACE esta cuarta feira.