Estabilizado un lume en Pontevedra e controlados outros dous en Ferrol e Soutomaior

As brigadas antiincendios lograron estabilizar esta tarde un lume que se declarou na parroquia de Lérez, na zona da Gándara, Pontevedra, nas proximidades de varias vivendas. Segundo a Consellaría de Medio Rural, no momento da súa estabilización o lume queimara 0,3 hectáreas de monte raso e as casas non corrían xa perigo. 

Para controlalo acudiron ao lugar un helicóptero, tres motobombas, tres brigadas e un axente. A columna de fume orixinada era visíbel desde varios puntos dos arredores.
Ademais, outros dous incendios que se declararon na tarde nos municipios de Soutomaior e Ferrol puideron ser controlados.

O de Soutomaior iniciouse ás 16.02 horas na parroquia homónima, e puido ser controlado unha hora máis tarde polos efectivos despregados, tras queimar 0,03 hectáreas de monte raso. Nos labores de extinción traballaron tres vehículos motobombas, dúas brigadas e un axente.

No caso de Ferrol, o lume empezou ás 14.50 horas na parroquia de Doniños e foi controlado ás 16.00 horas, cando arderan  0,15 hectáreas. Neste caso, traballaron sobre o terreo un helicóptero, tres motobombas, catro brigadas e un axente.

Na Coruña, un lume nas proximidades do polígono de Vío obrigou a cortar o tránsito ferroviario durante una hora.