Espir un santo para vestir outro na sanidade galega

"Cando fas as paces ca autoridade, convérteste en autoridade" Jim Morrison (1943-1971) Nos últimos anos, cos gobernos do Partido Popular na Galiza: a precariedade laboral, a inestabilidade e a privatización (por desmantelamento) da sanidade pública, é algo evidente. Leva consigo, que non teñamos persoal substituto para facer fronte ás vacacións, baixas e outros motivos de ausencia. A Administración non atalla o problema de raíz, que pasaría por facer contratos estables, ter un salario digno e un futuro esperanzador na sanidade pública, cunha carreira profesional que permita aos profesionais ter un futuro prometedor. Que sucede se falta un profesional en Muros? Desprázano de Outes... E que pasa en Outes? Quedan sen ese profesional mentres está "apagando o lume" de Muros... E que pasa se falta un pediatra en Lousame? Mándano de Noia... E que pasa en Noia? Quedan sen o servizo. A falta de pediatra en Santa Comba, "resólvese" mandando os cativos á Baña ou a Mazaricos. Se faltan en Bueu, derívanos doutro centro de saúde, co conseguinte déficit no servizo de orixe. Os veciños de Corrubedo, levan varios meses mobilizándose as quintas feiras, para demandar un médico a tempo completo... sen éxito! Fóra de servizo A problemática da asistencia sanitaria ocorre en todo o país: da Guarda a Laxe, da Mariña a Viana do Bolo. Hai falta de persoal de pediatría en Soutomaior (desde hai case un ano). No centro de saúde de Marín están sen cubrir seis prazas de persoal médicos (de 14) e a espera media para consulta é de 15 días. O dereito das mulleres na Galiza, grazas á "ocorrencia" do Sergas nos últimos días, verase privado e os abortos realizaranse nunha entidade privada En Ponte Sampaio temen un posible feche do consultorio. En Cangas teñen un déficit de persoal que xa fai insostible as consultas acumuladas doutros profesionais. Na Mezquita solicitan persoal médico substituto, que tampouco se cobre no Eixo. En Moaña, seguen as mobilizacións para recuperar o servizo de Urxencias. É a táctica de "espir un santo para vestir outro", que se emprega cando se intenta arranxar algo... estragando outra cousa, segundo recolle o refraneiro multilingüe do Centro Virtual Cervantes. É solución? Dende logo que non! O propio Consello Económico e Social (nada sospeitoso) no seu informe anual, móstrase contundente na "mala xestión da sanidade pública galega, con graves problemas de ineficiencia e xestión". A precariedade laboral leva consigo que moitos profesionais vaian a lugares lonxe da Galiza onde prestixian e dignifican a sanidade, cunhas condicións laborais atractivas para alguén que tivo que estudar e facer prácticas durante moitos anos e que, unha vez que finaliza a súa carreira, quere un posto de traballo acorde co esforzo realizado e ca responsabilidade de quen exerce no sistema sanitario público. A irresponsabilidade de pagarlle o Complemento de Exclusividade a Médicos que traballan na pública e na privada (sectores afíns ao PP e aos Colexios Médicos) é de tal magnitude que o que eran uns cartos pola "exclusividade" agora vai ser para todos, co cal o concepto queda desvirtuado e será un pao máis para os profesionais que só traballan na pública. Os abortos, na privada Outro "santo" que se ispe: o de realizar as Interrupcións Voluntarias do Embarazo na sanidade pública galega. O dereito das mulleres na Galiza, grazas á "ocorrencia" do Sergas nos últimos días, verase privado e os abortos realizaranse nunha entidade privada. Pagaranse 1,4 millóns de euros, en tres anos, prorrogables por outros dous (ata 2,5 m. de e.) para realizar o que debería estar garantido na sanidade pública. Di o Goberno galego que "ante a falta de recursos, tanto materiais como humanos no servizo sanitario público". Ah... e o da obxección de conciencia, como escusa, é un mecanismo non regulado pola Administración do PP e un caixón de xastre que exime, por cuestións ideolóxicas, de defender os dereitos das mulleres galegas. Na Galiza non existe un Rexistro de Obxectores de Conciencia, o que vulnera a legalidade. Outro chanzo máis na privatización (á vez que no desmantelamento) da sanidade pública galega. A Inspección da Xunta das residencias de maiores "avisa" de cando van facer as inspeccións, para que poidan adaptar as residencias á visita dos inspectores. Da falta de profesionais en saúde mental e das dramáticas listas de agarda para un problema tan importante, falaremos máis adiante. O futuro...Deus dirá!