Ecoloxistas piden o recoñecemento institucional dos dereitos do Ulla ante a "ameaza" de Altri
Amigas da Terra, Ecoloxistas en Acción e Greenpeace solicitaron esta quinta feira aos Concellos na ribeira do Ulla que presenten nos seus plenos municipais unha declaración institucional en defensa dos "dereitos" do río ante "ameazas" industriais como a futura fábrica de Altri.
Nun comunicado, explicaron que con esta declaración queren "avanzar na protección ambiental do Ulla, un río que abastece a numerosas localidades e que é refuxio natural para aves e multitude de especies ligadas a ecosistemas acuáticos".
Respecto diso, remarcaron que máis dunha trintena de Estados adoptaron instrumentos lexislativos para o recoñecemento de cursos fluviais, tal e como ocorre no río Ganges na India ou no Atrato en Colombia. No caso do Estado español, sinalaron o recoñecemento da personalidade xurídica á lagoa do Mar Menor e a súa conca como primeiro caso en Europa nun ecosistema como suxeito de dereitos.
Ademais, lembraron que recentemente na Galiza o Concello de Outes fixo unha declaración institucional dos dereitos do río Tins, o primeiro caso no Estado español. Agora, chaman a facer o propio co río Ulla, "un dos mellor conservados da Galiza, con usos tradicionais de rega e pesca, así como refuxio natural de multitude de especies".
Pacma rexeita a instalación da pasteira
O Partido Animalista Pacma tamén expresou esta quinta feira o seu rexeitamento á instalación dunha "megaplanta" de celulosa ante a proposta da empresa Altri para situar unha factoría en Palas de Rei, na comarca da Ulloa.
Nun comunicado remitido aos medios, a formación política trasladou a súa preocupación polo "grave impacto ambiental" que estas instalacións provocarían, con "consecuencias desastrosas para a contorna natural da Galiza".
Deste modo, a formación uniuse ás entidades ecoloxistas que rexeitan o proxecto ao considerar que supón "unha ameaza directa" para o "corazón da Galiza". Pacma advertiu de que consumiría "máis de 46 millóns de litros de auga ao día". Ademais, avisou de posíbeis vertidos ao río Ulla e dun aumento da eucaliptización.
"A localización proposta para esta fábrica é completamente inapropiada. Non só está nas inmediacións dunha zona protexida da Rede Natura, senón que ademais ameaza a biodiversidade única da rexión", declara a coordinadora da formación na Coruña, Manuela García.
Ademais, apuntou que a proximidade da fábrica ao Camiño de Santiago e o seu impacto visual, especialmente cunha cheminea de 75 metros de altura, tamén xera preocupación sobre o turismo e o patrimonio cultural locais.
Ante iso, Pacma criticou a "falta de consideración" cara ao futuro ambiental da Galiza, xa que a solicitude de captación de auga por parte da empresa non tivo en conta as proxeccións de cambio climático nin a posíbel escaseza de recursos hídricos.
Ademais, a formación advertiu de que a megafábrica produciría emisións significativas de contaminantes atmosféricos, como xofre, óxidos de nitróxeno e monóxido de carbono, o que podería influír na calidade do aire e a saúde dos veciños.
Por último, sobre o financiamento do proxecto, Pacma cuestionou o uso de fondos públicos (aproximadamente 250 millóns de euros) para apoiar unha iniciativa que non estaría a cumprir cos estándares de sostibilidade ambiental.