Educación renova concertos con colexios do Opus que segregan por sexo

A lei orgánica educativa vixente, a Lomloe (coñecida como 'Lei Celáa'), impide os concertos con centros educativos que segregan por sexo, unha disposición que a Xunta da Galiza asegurou a principio deste ano que cumpriría. Porén, o principal sindicato do ensino público na Galiza, a CIG, apuntou onte a unha renovación dos concertos con catro centros do Opus Dei onde se segrega por sexo. "Trátase dos centros Montespiño e Peñarredonda, na Coruña, e de Las Acacias e Montecastelo, en Vigo, que en total pasan de 58 a 74 aulas de Infantil concertadas con respecto ao curso pasado e nas que si se mantén a segregación, ao igual que en 1º da ESO, coa “escusa” de que a matrícula xa estaba fechada, afirman desde o sindicato nacionalista. No ensino público, o curso principia con 89 prazas e 60 unidades de Infantil e Primaria menos. O sindicato insta tanto a Inspección educativa galega, da que dependen estes centros, como a alta Inspección do Estado, que "vixíen que se se está a cumprir o estabelecido na Lomloe", dado que ten "todas as sospeitas" de que se poida estar eludindo a normativa. Neste sentido, tamén se solicitou á Administración galega "datos exactos" de matrícula con datos diferenciados por xénero en todas as aulas porque, ao ser ensinanza concertada, no caso de haber prazas libres tamén se debería abrir a posibilidade de matricularse tanto nenos como nenas. A Xunta da Galiza financiou o ensino privado con 2.496 millóns nos últimos dez anos O Diario Oficial da Galiza (DOG) publicaba este ano a orde de concertos que rexerá desde este curso 2023-24 e até o dos exercicios 2028-29. Segundo se desprende do capítulo da mencionada orde dedicado ao financiamento, o Goberno galego reservaba para estes concertos 1.902,9 millóns de euros até 2029. Supón 352,28 máis que na orde anterior, un incremento de perto de 23%. Consultada sobre a cuestión por Nós Diario, a Consellaría de Educación informa de que "vimos de aprobar a renovación dos concertos educativos que entran en vigor este curso en base á legalidade vixente. Os centros educativos que anteriormente podían legalmente diferenciar o alumnado en función do seu xénero pasan agora a adaptarse ao estabelecido na normativa estatal (antes tiñan o dereito de vetar matrículas mixtas e agora teñen a obriga de admitilas)". Subvencións á privada 2.800 millóns de euros dos orzamentos públicos do ensino na Galiza foron destinados entre 2012 e 2022 á educación privada, unha cantidade que nutre os convenios e acordos de ensino concertado. Son datos dispoñíbeis nos informes de gasto público en concertos e subvencións ao ensino privado do Ministerio de Educación e Formación Profesional, e que permiten coñecer canto destinan as Administracións (estatal, autonómica) a este concepto. A Xunta pagará ao ensino privado até 6.000 euros por aula suprimida O que dedica a Xunta da Galiza nesa década móvese entre os máis de 300 millóns de euros ao ano en 2020, 2021 e 2022 e os pouco máis de 231 millóns que destinou en 2013. Os informes do Ministerio tamén permiten coñecer como entre 2017 e 2020 a cifra destinada a concertos coa privada en educación Infantil e Primaria na Galiza foi duns 670 millóns de euros. Peso da relixión no ensino concertado No pasado curso había na Galiza un total de 1.646 centros de ensinanza non universitaria —Educación Infantil, Primaria, Secundaria, Bacharelato, Formación Profesional e Ensino Especial—, dos cales 1.227 son públicos e 419 de titularidade privada. Dentro desta clasificación, 227 escolas teñen subscritos concertos educativos coa Administración galega, cuxa cantidade total achégase aos 300 millóns de euros (12,2% do orzamento total de Educación, excluíndo a universidade). Mais, habida conta de que a Constitución de 1978 define o Estado español como "aconfesional" e sostén que "ningunha confesión terá carácter estatal", resulta salientábel o elevado número de escolas católicas concertadas que ten a Galiza. En concreto, 112 das 227 con concerto son escolas cun marcado carácter relixioso, isto é practicamente unha de cada dúas. A meirande parte destes centros englóbase na rede Escolas Católicas (EC), fundada en 2005 como herdeira da franquista Federación Española de Relixiosos do Ensino (FERE), operativa desde 1957. 60,5% dos ingresos do ensino privado en Galiza veñen das administracións públicas EC ten por obxectivo "fortalecer a escola católica e axudar as entidades titulares e os seus centros para desenvolver desde a súa identidade o seu papel evanxelizador e educativo". Aliás, insta a "desenvolver un papel fundamental na tarefa evanxelizadora da Igrexa española nun clima de mutua confianza". Profesorado de Relixión Na Galiza, o persoal docente de relixión no curso 2022/2023 era de 686 persoas, segundo os datos da Consellaría de Educación. Son 133 menos que hai unha década, curso 2012/2013, can-do eran 849. Porén, a partida que a Xunta destina a pagar eses profesores e profesoras, que son elixidas polas dioceses, sen oposición, apenas variou, era de 29,5 millóns de euros hai unha década e é de 29,7 millóns no actual curso.