As dúbidas sobre o decreto da Risga
Non se esperan grandes cambios, pois o contido do documento presentado pola Consellaría apenas ofrece avances nos puntos máis sinalados polos axentes sociais durante os últimos anos. O anuncio chega despois de aumentos continuados no orzamento e no número de persoas beneficiarias, que supera as 11.000 en todo o país. Eis un extracto da reportaxe publicada no Sermos Galiza 280.
Que supuxo este atraso e por que se considera importante o decreto? Entre outras cuestións, a falta de criterios definidos para resolver numerosos casos non recollidos na norma, foi a Consellaría quen determinou discrecionalmente o resultado das solicitudes. Máis de 11.000 galegas e galegos son beneficiarias na actualidade dunha Renda de Integración Social de Galiza (Risga), regulada por esta lei, e que está destinada a persoas na pobreza severa ou na exclusión.
“Provocou indefensión, opacidade e descontrol. Impediu que se desenvolvesen algúns dos apartados, en teoría, máis beneficiosos para a xente. Durante os últimos anos a xestión da Risga seguiu instrucións que descoñecíamos, na escuridade, e con tendencia a interpretacións restritivas da norma”, apunta Diego Lores, portavoz da Oficina de Dereitos Sociais (ODS) de Coia, en Vigo, o concello con maior número de persoas beneficiarias, case unha de cada catro en todo o país.
[Podes ler a reportaxe íntegra no número 280 de Sermos Galiza, á venda na loxa e nos quiosques]