Doentes que esperan nas urxencias do Chuac até 72 horas por unha cama libre
O encerramento de camas está a provocar o “colapso” no servizo de urxencias, denuncia o sindicato.
O Complexo hospitalario universitario da Coruña (Chuac) pechou máis de 200 camas en diferentes unidades de hospitalización, desde medicina interna até coidados paliativos. Unha medida que, denuncia a CIG, está a xerar o “colapso” do servizo de urxencias do complexo hospitalario herculino.
“Durante toda a fin de semana no Servizo de Urxencias houbo unha saturación continua. Esta segunda feira ás 8:00 horas, había máis de 160 pacientes no Servizo de Urxencias dos que, cando menos, 42 estaban á espera de cama. Moitos destas e destes doentes levaban xa nesta situación máis de 48 horas. Persoas maiores, enfermas, amoreadas en padiolas, que están a soportar, ademais do sufrimento pola súa enfermidade, unhas penosas condicións asistenciais”, denuncia o sindicato nacionalista.
Ademais, esta terza feira continuaban á espera de cama máis de 30 doentes de Medicina Interna ou Neuroloxía “que teñen bloqueadas as camas nas que deberían ingresar. Pacientes que levan, nalgún caso, máis de 48 horas e até 72 horas”.
CIG-Saúde esixe a apertura inmediata de todas as camas dispoñibles no CHUAC e recuperar a plena capacidade asistencial, médica e cirúrxica que teñen os Hospitais públicos.