A reforma do Código Penal impulsada polo PP criminaliza as mobilizacións sociais
As mobilizacións cidadás poden deixar de ser un dereito para pasar ser un delito, por moi pacíficas que transcurran. O goberno de Mariano Rajoy impulsa unha reforma do Código Penal que, a xuizo de colectivos de dereitos civís e xuristas, conleva unha "criminalización desproporcionada" das protestas das cidadanía.
En base á proposta do ministro de Xustiza, Ruíz Gallardón, pasarase a criminalizar actividades que até o de agora non ran consideradas delito (senón falta), como ocupación simbólica e pacífica de entidades bancarias, o encadeamento para evitaren desfiuzamentos ou convocar manifestacións a través das redes sociais en determinados supostos.
A normativa penal máis dura de Europa
Mesmo desde Jueces para la Democracia (JpD) afirmouse que a combinación dos recortes sociais coa aprobación da normativa penal máis dura de Europa permite falar de que o estado español pasa de un "Estado social a un Estado penal".
De igual xeito, asociacións de avogados e colectivos de diverso tipo --desde o 15M, sindicatos até de defensa dos dereitos civís, consideran que o anteproxecto pretende criminalizar actividades que até o de agora non eran consideradas delito e que son medidas "para criminalizar a protesta social", "desproporcionadas", e que non deberían estar incluidas nun Código Penal.
Nesta liña, poñen como exemplo que a resistencia á autoridade. Trátase dun concepto tan laxo que permitiría incluir nel até a petición de explicacións a un axente ao requerir identificación, e que pode levar aparellado a petición de penas de prisión.
Amparar o inamparábel
Hai quen considera que con esta proposta de reforma do novo Códico Penal téntase amparar "o inamparábel" e poñen de exemplo que moitas actuacións desproporcionadas das forzas policiais --con detencións arbitrarias a participantes en mobilizacións ou protestas-- acababan coa posta en liberdade sen cargos dos e das detidas ou, como moito, coa imposición de multas. "Con esta reforma queren que non se den máis casos deses e que todos acaben pagando".
"Teremos o Código Penal máis duro de Europa contra as protestas civís", ao tempo que se veñen recortando como nunca os dereitos sociais e laborais. Unha combinación perigosa, lembran asociacións como a antes mencionada, pois derivan nun Estado que ve na súa propia poboación un simple obxecto de control, submetimento e represión, e non un suxeito con dereitos, incorrendo nunha grave restrición das liberdades democráticas.