O director da CRTVG acusa "sindicalistas" de ter exercido "intimidación" contra xornalistas no escándalo de Fernández Díaz
Alfonso Sánchez Izquierdo respondeu así ás preguntas da oposición que denunciou "censura" no tratamento informativo da noticia.
O director da CRTVG, Alfonso Sánchez Izquierdo compareceu esta quinta feira en comisión parlamentar onde foi interpelado polas forzas da oposición a respeito do tratamento informativo do escándalo político que atinxe o ministro do Interior en funcións, Fernández Díaz. A cobertura que a canle pública de televisión fixo do caso --24 horas após terse coñecido e priorizando a reacción do goberno ás gravacións feitas públicas-- motivou protestos na redacción de informativos que Sánchez Izquierdo.
O director da CRTVG di que abrirán unha investigación após as manifestacións de protesta e porán unha "contorna de vixianza"
Neste senso, o director da CRTVG acusou a "sindicalistas" de "intimidar seriamente" a xornalistas e profesionais nunha acción que, dixo, fora anunciada previamente. No concreto, Sánchez Izquierdo referiuse a "nove persoas do comité" que entraron na redacción con "megáfonos e cartaces" para exercer unha "intimidación directa" do persoal. Como resposta, avanzou, a dirección da compañía adoptará unha serie de medidas entre as que se atopa "pór unha contorna de vixianza até que se aclare a situación", "abrir unha investigación" e mesmo "adiar" as conversas co comité de empresa.
Sánchez Izquierdo tilda de "excesiva" a cobertura da nova na web da CRTVG
Malia as críticas da oposición ao tratamento informativo Sánchez Izquierdo mesmo coidou "excesiva" a presenza da nova na páxina web da CRTVG e atribuíu a non reprodución das gravacións a que "non sabes como che veñen". "Hai medios que as deron e outros que non", "non estaba garantida a orixe".
Ao respeito a deputada do BNG, Montse Prado, acusou o director da CRTVG de empregar os medios públicos "en beneficio do PP de modo obsceno" e cunha "manipulación sistemática" da información.
Pola súa banda, o deputado de AGE, Juan Fajardo censurou a "animadversión" e o "desprezo" de Sánchez Izquierdo cara ás persoas que son representantes sindicais do cadro de persoal da CRTVG.