Detido en Compostela por suplantar identidade en redes sociais para pedir imaxes sexuais a menores
O home, de 29 anos e veciño dunha localidade próxima á capital galega, suplantou a identidade dunha moza malagueña
Axentes da Policía Nacional detiveron en Compostela un home como presunto autor dun delito de corrupción de menores, xa que supostamente suplantara a identidade dunha moza malagueña para crear un perfil falso nas redes sociais, empregando as imaxes e vídeos da afectada, para contactar con menores e conseguir imaxes de contido sexual.
O inicio da investigación remóntase a mediados de 2022, cando unha cidadá malagueña denuncia que, sen autorización, unha persoa estaba a utilizar as súas fotografías e vídeos noutro perfil dunha coñecida aplicación da internet, co fin de contactar con menores de idade e conseguir contido visual de índole sexual. Os axentes do Grupo de Ciberdelincuencia adscrito á UDEV da Comisaría Provincial de Málaga fanse cargo da investigación e encamiñan as pescudas en localizar a esta persoa, segundo informou a Policía Nacional nun comunicado.
Tras as oportunas xestións de investigación, e grazas aos datos achegados por algunhas vítimas, os axentes sitúan o perfil ficticio na Galiza, onde era moi coñecido entre mozos, principalmente, menores da zona, chegando a ter máis de 2.000 seguidores. Os prexudicados crían que estaban en contacto cunha moza, máis ou menos da súa idade, que subía moito contido ao seu perfil, tanto fotos como vídeos. Cando se gañaba a súa confianza, esta suposta moza solicitáballes imaxes de contido sexual, conseguindo o seu propósito en varias ocasións.
Finalmente, os axentes lograron identificar plenamente ao presunto autor, un home de 29 anos, veciño dunha localidade próxima a Compostela. Logo da súa detención, realizouse un rexistro no domicilio onde varios dispositivos informáticos foron intervidos. Nunha análise posterior dos mesmos acháronse case 800 arquivos da denunciante, fotos e vídeos que ela mesma colgaba nas súas redes.
O arrestado, ao que se lle imputou un delito de corrupción de menores, foi posto ao dispor do Xulgado de Instrución número 2 de Santiago de Compostela.
Risco das redes
Nun comunicado, os axentes especialistas en Ciberdelincuencia fan fincapé nos perigos das redes sociais. Manifestan que os “depredadores sexuais” válense do anonimato e da facilidade para crear perfís falsos aos que dotan dunhas características concretas para captar a atención de vítimas inmaturas.
Lembraron que estes feitos poden desencadear noutros máis graves, podendo o autor extorsionar os menores, solicitando máis material a cambio de non difundir o obtido previamente entre os seus contactos ou familiares.