Defensa da Sanidade denuncia que o peche de camas no verán "provocará o desvío" cara á privada

A Asociación en Defensa da Sanidade Pública denuncia que o peche de camas hospitalarias no verán "provocará aínda máis a derivación" a centros privados da Galiza.

Así o manifestou esta asociación nun comunicado, no que insiste en que a decisión de pechar camas no verán "supón un novo paso no camiño cara á privatización sanitaria, aproveitando a pandemia".

Neste sentido, subliñou que o "peche das camas públicas durante o verán, en hospitais parcialmente paralizados durante a pandemia, provocará un maior aumento das demoras na atención das pacientes que están a recibir tratamento".

"Este aumento, xunto coa chamada Lei de Garantías de prestacións sanitarias, provocará aínda máis a derivación dos pacientes a centros privados", advertiu esta asociación.

Por este motivo, defendeu a "necesidade de aumentar significativamente a actividade dos servizos hospitalarios públicos, en lugar de pechalos", concluíu.

En definitiva, esta asociación esixe que "non se pechen as camas nesta tempada estival" e que "se incremente o orzamento para diminuír notablemente as listas de espera no sistema sanitario público galego".