Declaran dúas novas testemuñas no xuízo pola desaparición e morte de Déborah Fernández

Dúas novas testemuñas declararon esta terza feira no xulgado de instrución número 2 de Tui, no marco da investigación pola desaparición e morte da moza viguesa  Déborah Fernández Cervera.

Estas dúas persoas foron propostas para declarar polos avogados da familia de Déborah, co obxectivo de evidenciar as "contradicións" do antigo mozo da rapaza, principal sospeitoso e único imputado neste procedemento.

En concreto, e segundo puido saber Europa Press, a finalidade destas comparecencias era achegar novos datos sobre algúns dos feitos declarados polo imputado o pasado 11 de marzo.

Aquela sesión, a primeira na que o acusado declaraba ante a maxistrada, estivo destinada a intentar esclarecer o tipo de relación que mantiña coa moza no momento da súa desaparición e posterior morte.

Refutar a versión do acusado

Nesa sesión, o imputado defendeu a súa inocencia e negou estar con Déborah o día en que se lle perdeu a pista. Tamén argumentou que romperan a relación tempo atrás e non tiñan contacto.

Precisamente, a familia de Déborah, a través dos seus letrados, propuxo a comparecencia destas dúas testemuñas que declararon no día de hoxe para tratar de refutar a versión e afirmacións do acusado.

Á marxe destas citacións, a instrución xudicial segue a súa marcha, á espera de que cheguen os resultados dalgunhas probas de ADN e o informe definitivo sobre o disco duro da computadora de Déborah, do que xa se adiantou nun informe preliminar que fora manipulado por alguén experto.

Neste momento, faltan só catro días para que prescriba a opción de desenvolver novas actuacións no caso, salvo as que teñan que ver co único investigado. Isto quere dicir que, a non ser que a xuíza teña indicios para o contrario, non se poderá imputar ninguén máis a partir do 30 de abril.