Seis das sete áreas sanitarias rexistran positividade por Covid por riba do limiar marcado pola OMS
Os contaxios detectados na Galiza mantéñense con 327 nun día.
Os datos da Consellaría de Sanidade reflicten que até o momento realizáronse na Galiza un total de 858.609 PCR, o que implica que en 24 horas fixéronse 4.468. Isto supón unha importante baixada, xa que se practicaron 1.675 PCR menos que o día anterior.
En canto á positividade, elevouse até o 7%, unha cifra superior ao 5% que marca a Organización Mundial da Saúde (OMS) para dar por controlada a pandemia.
De feito, tan só a área de Vigo está por baixo deste limiar, co 2,2% de positivos, mentres que seguen por riba Pontevedra (17,5%), Santiago (9,7%), Ourense (8,1%), A Coruña (7,4%), Lugo (6%) e Ferrol (5,8%).
Porén, esa taxa rexistrou nestes días un importante descenso a respecto dos niveis que marcaba a semana pasada e que a situaban na Galiza por riba do 10%.
Contaxios
Galiza rexistrou 327 novos contaxios de coronavirus confirmados por PCR en 24 horas, o que implica unha estabilización ao subir en tan só catro con respecto aos notificados a xornada anterior.
As áreas que rexistraron repuntas son as de Lugo, Ourense, Santiago e Vigo, pero a de Pontevedra mantense á cabeza co maior número de novas infeccións, con 70 positivos nun día.
Das áreas nas que subiron os novos casos confirmados, a de Lugo-Monforte-A Mariña sitúase como a de maior incidencia, con 60 novos casos, 22 máis que os notificados a xornada anterior. Segue a esta Santiago-Barbanza, con 52 novos positivos (+10); Vigo, con 43 (+1); e Ourense-Verín-O Barco, con 21 positivos (+5), que continúa como área con menos infeccións detectadas diariamente.
Pola contra, notificaron descensos nos positivos en 24 horas as áreas da Coruña, con 53 novos (-15), e Ferrol, con 28 (-13).
En canto aos casos activos -persoas que aínda están diagnosticadas da enfermidade-, esta terza feira baixaron en 52, até colocarse no total de 8.617 pacientes.
.Con todo, tamén continúan á alza as vítimas mortais diagnosticadas de Covid-19, que hoxe, terza feira, se sitúan en 1.161 tras notificarse onte 15 novos falecementos, dos que sete eran usuarios de residencias de maiores.