Curso de horta na casa: elixir correctamente o lugar para cultivar

Na lección anterior repasabamos as consideracións máis importantes a ter en conta para escoller os lugares onde estabelecer as nosas plantas e cultivos como, por exemplo, que contara cun mínimo de horas de luz, elixir o lugar en función do espazo dispoñíbel, ter acceso a auga perto dos cultivos etc. Na lección de hoxe centrarémonos nos tipos de lugares en que plantar, tales como testos, bancais, regos, mesas de plantación, elementos reciclados... e tamén veremos como preparalos para iniciar a tempada, xa que son moitas e moi diversas as posibilidades. Plantar en exterior Se contamos cun espazo no exterior da casa poderemos utilizar varios métodos para plantar: —Bancais: Este tipo de elementos facilitan e axilizan moito o traballo na horta xa que dunha tempada para outra levaranos moito menos esforzo e tempo volver preparalos. Os bancais consisten en divisións que se fan no terreo, habitualmente adoitan ser cuadrangulares, mais poden ter diferentes formas e tamaños. Acostuman ir fechados ao redor con elementos como madeira, ladrillos, tellas ou outros materiais reciclados, para evitar que a terra se esparexa e quede no interior do bancal. Os bancais poden ser elevados ou profundos. O primeiro paso para facer un bancal consiste en delimitar a zona en que o imos instalar, unha vez marcada teremos que arar a terra (á man ou axudándonos de maquinaria como, por exemplo, un motocultor). En caso de ser un bancal elevado, teremos que colocar ao redor as táboas, ladrillos ou o material que escolléramos para fabricalo e, unha vez colocadas, enchelo de terra. No caso de ser un bancal profundo non nos fará falla achegar máis terra da que saquemos do propio terreo, mais, de ser un bancal elevado, teremos que introducir terra extraída doutras zonas da horta (dos corredores que fagamos entre bancal e bancal, por exemplo). Cómpre ter en conta a distancia entre bancais para poder moverse con liberdade entre eles con ferramenta, cortacéspede, carretillo etc. Os bancais poden ser do tamaño que se considere oportuno, dependendo do espazo co que se conte e das necesidades, mais haberá que pensar sempre en deixar un acceso sinxelo a el para conseguir chegar ao centro do bancal desde ambos os lados, ou dunha parte a outra do bancal no caso de só quedar libre unha parte. É dicir, non se debe facer un bancal demasiado longo que impida chegar a todos os cultivos sen ter que pisalo. —Regos: Outro método máis tradicional consiste en plantar a través de regos no terreo. Primeiro hai que aralo ben e deixalo limpo de pedras, raíces, e outros elementos que vaian aparecendo na terra. Unha vez ben aireado e angazado, cavaranse os regos ao longo do terreo que teñamos para plantar. Cómpre lembrar deixar un espazo entre rego e rego suficiente como para poder camiñar entre os cultivos. A profundidade do rego dependerá do cultivo que vaiamos plantar. Para algunhas plantacións como as cenorias non é preciso facer regos, xa que as esparexeremos nunha area sen ningunha orde. Cando vaian medrando haberá que clarealas arrincando os exemplares que estean moi pegados. Plantar en interior No caso de non contar cun espazo fóra para plantar, deberemos adaptar a zona que teñamos na casa ou no piso (balcón, terraza, un lugar perto dunha fiestra...). Os materiais a utilizar son moi variados xa que poderemos plantar en testos, en recipientes reciclados como botellas, caixóns, botes... e tamén en mesas de cultivo que poderemos estabelecer en lugares máis grandes como unha terraza ou balcón, ou nunha habitación ampla onde teñamos sitios para elas. O primeiro é asegurarnos de que os recipientes que usemos teñan buratos ou un espazo de drenaxe para evitar que a auga se acumule neles e poidan podrecer os cultivos. Unha vez que teñamos os recipientes preparados será o momento de enchelos co substrato. Que tipos de substrato hai? Elixir un bo substrato é indispensábel na horta, xa que vai ser o lugar onde naza, medre e se alimenten os cultivos. Entre os substratos máis habituais podemos atopar: —Substrato universal: Este preparado, como ben indica o seu nome, serve para todo tipo de cultivos e plantar ornamentais. Adoita estar composto por fibra de coco, turba, e materia orgánica. O substrato universal retén moi ben a humidade e, ao conter materia orgánica, é unha gran fonte de alimento para os cultivos. A única desvantaxe é que é bastante pesado. —Substrato de fibra de coco e humus de miñoca:Este substrato está formado por dous elementos, a fibra de coco, que achega o lugar onde plantar ademais dunha gran lixeireza, e o humus de miño - ca, que aporta os nutrientes necesarios para que as plantas e cultivos medren fortes. A fi - bra de coco vén deshidratada, polo que ocupa moi pouco e é moi lixeira, unha vez humede - cida aumenta até 15 veces o seu tamaño. Este tipo de substrato ten un PH neutro que fai que sexa válido para case calquera cultivo, e ten como vantaxe, fronte ao substrato universal, que pesa moito menos e dá li - xeireza ao noso horto. Que características debe ter un bo substrato? Un bo substrato que permita medrar os cultivos sans e fortes, e que permita traballar con facilidade tanto no interior como no exterior, ten que cumprir polo menos tres características básicas e principais: 1. O substrato non pode ser moi compacto, xa que as plantas e cultivos precisan espazo para expandir as súas raíces. Polo que se este é lixeiro o labor seralles moito máis sinxelo. Se o substrato é moi compacto ou está pouco aireado, as plantas e cultivos non conseguirán enraizar con facilidade. 2. O substrato debe achegar nutrientes, esenciais para un correcto desenvolvemento dos cultivos. Isto, sobre todo, é moi importante nos hortos interiores, xa que as plantas contan cun espazo moi pequeno onde desenvolverse e este ten que ser moi rico en nutrientes. Ademais, ao estaren no interior é moi difícil que teñan algún aporte de nutrientes externo e natural, polo que dependerán exclusivamente dos que nós lle proporcionemos. 3. O substrato debe reter ben a humidade, mais ao mesmo tempo debe deixar drenar a auga restante cara ao fondo do terreo. Hai algúns substratos de moi baixa calidade que semellan ser impermeábeis e non absorben correctamente a auga, polo que debemos buscar un que estea en equilibrio entre a retención de humidade e a drenaxe da auga sobrante. Fertilizante Tanto se plantamos no interior como no exterior, ademais de airear a terra e de comprobar que o substrato que usamos é axeita - do, deberemos tamén proporcionar fertilizante aos cultivos. Nas seguintes leccións afondaremos sobre as diferentes substancias fertilizantes que hai e as que mellor se adaptan para cada lugar e para cada plantación. En xeral, podemos afirmar que en espazos exteriores usaremos fertilizantes como esterco, compost, galiñaza etc, porén no interior tentaremos recorrer a preparados que non proporcionen malos cheiros e cos que sexa sinxelo traballar como o humus de miñoca, pousos do café etc. Agora que coñecemos a importancia de ter un bo solo, un bo substrato e un bo fertilizante soamente queda decidir cal se adapta mellor ás nosas necesidades, tempo e espazo!