O curso escolar 2025/26 arrincará o 8 de setembro na Galiza e finalizará o 19 de xuño: consulta aquí todos os detalles
O próximo curso escolar 2025/2026 empezará na Galiza o próximo 8 de setembro e finalizará o 19 de xuño de 2026 para todas as etapas educativas, excepto os segundos cursos dos ciclos formativos de grao Básico, Medio e Superior de FP, que terminarán o 15 de xuño, tal e como publica esta quinta fera o Diario Oficial da Galiza (DOG).
Con todo, no caso dos Ensinos de Réxime Especial, do mesmo modo que no presente curso, tendo en conta as características e particularidades deste tipo de ensinos, poderá flexibilizarse o arranque até o 15 de setembro como moi tarde. Así mesmo, no caso do 2º curso de Bacharelato, as clases terminarán de acordo coas datas previstas para a proba de acceso á universidade, a PAU.
Os períodos de vacacións escolares irán do día 22 de decembro de 2025 ao 7 de xaneiro de 2026, ambos inclusive, no Nadal; os días 16, 17 e 18 de febreiro de 2026 para o Entroido, e desde o día 30 de marzo ao 6 de abril, ambos as xornadas incluídas, para a Semana Santa. Ademais, serán días non lectivos o 31 de outubro (Día do ensino), o 3 de novembro e as festas laborais de ámbito estatal, autonómico e local.
A orde de calendario tamén recolle que, para o próximo curso, as probas de avaliación de diagnóstico fixadas polo Goberno do Estado español a través da LOMLOE para 4º de Primaria terán lugar entre o 20 e o 24 de abril, e para 2º de ESO realizaranse entre o 13 e o 17 de abril.
En canto ao período de adaptación para o alumnado de 4º curso de Educación Infantil, os centros poden optar por unha incorporación gradual que non se prolongará máis aló do 12 de setembro.
Prazos de matrícula
Unha vez fechado o prazo de solicitude de praza nos centros e publicadas xa as listaxes provisionais de persoas admitidas e excluídas o pasado 25 de abril, o próximo 15 de maio sairán as definitivas.
Tras iso, os prazos de formalización de matrícula serán do 20 ao 30 de xuño para os alumnos e as alumnas de Infantil e Primaria e do 23 de xuño ao 7 de xullo para as de ESO e Bacharelato.