Crean unha ferramenta máis precisa que facilita a análise das variantes do virus
Científicos do Instituto de Investigación Sanitaria de Santiago de Compostela (IDIS) desenvolveron unha ferramenta bioinformática para analizar as variantes do virus e a súa distribución xeoespacial.
En concreto, a plataforma de análise CovidPhy facilita a tarefa de aliñar as secuencias do coronavirus de pacientes co xenoma de referencia do SARS-CoV-2 e coñecer as mutacións xenéticas que presenta, segundo informa o Servizo Galego de Saúde (Sergas). Unha vez aliñadas, a ferramenta clasifica as secuencias nas variantes do virus coñecidas.
Supercontaxiadores
Os investigadores do IDIS Antonio Salas e Federico Martinón-Torres publicaron na revista científica Environmental Research os detalles da plataforma, que permite coñecer os xenomas que máis impactaron en brotes derivados de eventos de supercontaxio e a distribución xeoespacial das variantes a nivel mundial.
A este respecto, Salas lembrou que, desde o comezo da pandemia, constatouse que o "verdadeiro catalizador" eran os eventos de supercontaxio e sinalou que, como novidade, CovidPhy recolle os de maior importancia e achega información sobre as súas características.
Á procura de mutacións
Ademais, destacou que esta ferramenta conta con capacidade para buscar mutacións ou conxuntos das mesmas nunha base de datos con máis de 1,4 millóns de virus secuenciados e permite obter resultados "en cuestión de segundos".
Pola súa banda, Martinón-Torres asegurou que a plataforma "axudará a moitos laboratorios e investigadores de todo o mundo a analizar os seus resultados de secuenciación do virus e a interpretalos". "É útil non só na investigación básica, senón tamén na práctica clínica", resaltou.
Unha ferramenta flexíbel
Neste sentido, indicou que CovidPhy foi deseñada para poder adaptarse sinxelamente á natureza cambiante do virus e mesmo a outros patóxenos.
Ademais de Salas e Martinón, o proxecto contou coa participación do programador informático Xabier Bello, o matemático Jacobo Pardo e o biólogo e xenetista Alberto Gómez.
A iniciativa conta con financiamento da Xunta da Galiza e do programa Horizonte 2020 da Comisión Europea.