O Congreso "Cos pés na terra" reúne en Carballo innovadores de todo o país

Nisto da innovación, caemos nun erro de base. Adoitamos admirar o que se está facendo fóra e esquecemos que, tamén, na nosa contorna, están a xurdir proxectos creativos e exitosos. Carballo, unha vila de sangue novo, cunha importa

Nel poderemos saber dalgún dos proxectos máis innovadores das empresas bergantiñás, coñecer en fóra exitosos emprendedores como Paco Morales, o inventor das gastroimpresoras, e participar ademais nos espazos para a formación e o encontro. O xoves pola tarde terá lugar o obradoiro Desing Thinking, que utiliza unha metodoloxía da universidade de Standford para transformar en produtos as ideas, e o venres, tamén pola tarde, terá lugar o encontro Lacon Network, unha quedada que, unha vez ao mes, reúne a emprendedores de todo o país e que, nesta ocasión, terá lugar en Carballo.

Inventos made in Bergantiños

A sesión do xoves pola mañá estará dedicada á innovación local, ás e aos emprendedores de Carballo e dos seus arredores. Algúns deles están a conseguir atravesar fronteiras. Tal é o caso do proxecto on line Fútbol Táctico, que é seguido por adestradores de fútbol e de fútbol sala de diversos puntos. Esta xente de Coristanco xa conseguiu entrar, con el, no mercado latinoamericano, e agora están lanzando a versión en inglés.

 Outra das iniciativas, Statics Boards, chéganos de Malpica para falarnos da súa 

experiencia: o deseño e fabricación de placas electrónicas, sobre todo para impresoras. Destacado é tamén o caso de Lupeón, que traballan no modelado e impresión en 3D, chegando mesmo a facer próteses dentais con impresoras 3D.

Na sesión do xoves pola mañá tamén estará Digiswitch, gañadores do premio Carballo emprende, e inventores dun sistema eléctrico que substitúe interruptores, conmutadores e cruzamentos por simples pulsadores, de modo que se elimina a chispa ao accionar o pulsador e, así, elimina riscos.

No caso dos carballeses Bricogeek, o seu éxito deriva de teren convertido en auténticos geeks (persoas moi fascinadas pola tecnoloxía, máis aló do friki), con produtos á venda que sería difícil atopar en ningún outro lado. Tamén Herfraga, unha das empresas carballesas máis internacionalizadas, contará a súa experiencia en relación coa exportación de maquinaria para a industria conserveira. O mesmo fará Mamá Lola, produtora de animacións e factoría audiovisual.

"O Lacon Network é unha quedada de persoas ligadas ao ámbito do emprendemento e das tecnoloxías que ten lugar todos os últimos venres do mes nun lugar diferente do país. O anterior foi en Vigo e este terá lugar en Carballo"

Innovación ao longo do país e fóra

Teremos oportunidade de coñecelos o venres pola mañá. Con nós estará ese día, chegado dende Córdoba, o chef Paco Morales, alumno de Ferrán Adriá, que está a traballar na  Gastroimpresión, a impresión en 3D de comida.

Xunto a el teremos a Adrián Muiños,  que leva xa máis de quince anos comercializando algas, que hoxe chegan a países dos cinco continentes. Paco de Pin, da importante xestora cultural Nordesía, que se encarga de eventos como a organización do Womex, falaranos do novo modelo no negocio musical.

Design thinking e Lacon Network

O Congreso tamén terá lugar para a formación e o encontro de emprendedores. A formación correrá a cargo do obradoiro de Design Thinking impartido por Vermis Project, dous enxeñeiros industriais galegos que amosarán, o xoves pola tarde, como aplicar os protocolos do deseño industrial a calquera idea que queiramos transformar en produto. O aforo está limitado a 25 persoas, polo que é importante inscribirse previamente.

O Lacon Network, que terá lugar ás 14.30 do venres, é unha quedada de persoas ligadas ao ámbito do emprendemento e das tecnoloxías que ten lugar todos os últimos venres do mes nun lugar diferente do país. O anterior foi en Vigo e este terá lugar en Carballo, coincidindo coa celebración do Congreso. Para inscribirse no Lacon Network será preciso o pago de 20 euros.

O resto das actividades son de balde, mais  precísase  inscrición pois o aforo limitarase a 100 persoas nas sesións de mañá.