Concentración en apoio ás reivindicacións pola devolución da Casa Cornide na Coruña
12 de outubro de 2020 (23:19 h.)
Unha concentración en réxime de autoconvocatoria diante dos xulgados da Coruña prestará a vindeira cuarta feira, ás 11.30 horas, apoio ás nove persoas que están chamadas a declarar, denunciadas pola acción que en setembro de 2017 tomou simolicamente a Casa Cornide.
Estas nove persoas denunciadas, activistas e militantes do BNG subiron naquela data á varanda Casa Cornide, propiedade da familia Franco, para reivindicar a devolución deste ben ao patrimonio público.
Serán axuizadas este 14 de outubro por un delito leve de coaccións como resultado da denuncia interposta polos Franco, que teñen á venda o inmóbel, de titularidade pública até 1962.
Por aquela mobilización pacífica, a descendencia do ditador pedía penas moito máis severas, de até nove anos de cadea e 24.000 euros de multa por cabeza, se ben a Audiencia coruñesa rexeitou a maior parte dos delitos aos que se remitía a denuncia.