Comesaña cre que propoñer outro modelo diferente ao das áreas sanitarias é "non vivir na realidade"

A preguntas dos medios despois das críticas da Confederación Estatal de Sindicatos Médicos en Galicia (CEMS) sobre o funcionamento das áreas sanitarias na Galiza despois da dimisión do xefe de servizo de Xinecología do CHUS, Manuel Macía, Comesaña sinalou que "calquera galego de boa fe que vexa o que pasa nos hospitais comarcais é consciente de que grazas ás áreas sanitarias a asistencia nos comarcais está a garantirse".

Con todo, recoñeceu que é "moi complicado" manter os servizos asistenciais nos hospitais comarcais en "un contexto como este".

Este xoves dimitía o xefe de xinecología do CHUS, segundo o CESM, despois de que a xerencia "continúe impondo a xinecólogos do Clínico a realización de gardas no Barbanza durante anos".

Ante isto, Comesaña asegurou que hai "moitos exemplos ao longo da nosa xeografía" de profesionais das áreas sanitarias que "van facer esas gardas" aos comarcais. "Non é o único caso o de xinecología", insistiu.

"Se non houbese áreas sanitarias, non quero imaxinar o que tería pasado nos hospitais comarcais", reiterou en declaracións no Hotel Monumento San Francisco de Santiago antes de inaugurar unha xornada sobre o dano cerebral organizada por Fegadace.

Así mesmo, cuestionado por se se propón facer un cambio na área sanitaria despois de que se pedira o cesamento da actual xerente, Eloína Núñez, Comesaña afirmou que a área sanitaria de Santiago e O Barbanza fai "un esforzo grandísimo por manter a asistencia sanitaria na área" e, ademais, "mantelo cun maior nivel de calidade".

Por iso, volveu a insistir en que as áreas sanitarias son "fundamentais" para o mantemento da asistencia nos hospitais comarcais.

En todo caso, agradeceu ao servizo de xinecoloxía da área sanitaria compostelá "axudando aos xinecólogos do Barbanza" e agradeceu tamén o traballo do até agora xefe desta especialidade. "Seguiremos traballando para manter a asistencia sanitaria de alta calidade na comarca no hospital do Barbanza", sentenciou.

Nesta mesma liña, o titular de Sanidade reivindicou que acaban de "publicar a lei de comarcais que trata de garantir a asistencia nestes centros".