Cadea humana en Coia, Vigo, polo incremento do gasto social nos orzamentos municipais para 2013

Ducias de persoas tomaron parte na cadea humana que se levou a cabo no barrio vigués de Coia, convocada por Oficina de Dereitos Sociais de Coia e a parroquia Cristo da Victoria, para denunciaren tanto a difícil situación que atravesan milleiros de veciñ@s como demandar das administracións, e nomeadamente o concello, medidas ao respecto.

"Día a día estamos a comprobar que en Coia, como noutros tantos barrios e lugares, a dor e a inxustiza gañan espazo baixo o rostro cruel do paro, a falla de recursos para chegar a fin de mes ou para facer fronte aos recibos de luz ou auga, a perda da vivenda...", afirmaron os convocantes. Unha situación que se plasma en datos: 14.000 persoas desempregadas no INEM de Coia (o 36% dos parados de Vigo), das cales só algo menos de 5.000 reciben algunha prestación ou subsidio.

14.000 persoas desempregadas no INEM de Coia (o 36% dos parados de Vigo), das cales só algo menos de 5.000 reciben algunha prestación ou subsidio.

Aliás, afirman que, "debido principalmente a unha previsión orzamentaria insuficiente, tivo lugar un endurecemento das condicións e un incremento das dificultades para acceder ás axudas económicas municipais dirixidas a cubrir situacións de emerxencia e falta de recursos (pagamento de recibos de luz ou auga, alimentos, material escolar dos cativos...)".

E a iso engaden "a escasez do número de axudas sociais e da contía das mesmas (só 5000 familias en Galicia e 1000 en Vigo perciben a RISGA, cunha media de 400 euros ao mes), vén a agravarse polos atrasos inadmisibles por parte do Concello á hora de tramitar ditas axudas, atrasos que supoñen un incuprimento intolerable da legalidade vixente en materia de RISGA, que obriga a resolver os expedientes en tres meses".

Medidas

Os e as concentradas exíxenlle ao concello que cumpra coa súa obriga de garantir os dereitos fundamentais das veciñas e veciños da nosa cidade incrementando de xeito considerábel, en detrimento doutras partidas non prioritarias, as destinadas a asuntos sociais e, en concreto, ás axudas económicas dirixidas a cubrir situacións de emerxencia e falla de recursos.