A calixe e as tormentas afectarán esta cuarta feira a metade oriental da Galiza

A chegada de po sahariano afectará esta cuarta feira á metade oriental da Galiza, onde se prevé que boa parte das comarcas ourensás e luguesas, así como as zonas máis ao leste das comarcas coruñesas e pontevedresas, conten cunha mala calidade do aire.

Así figura no Índice de Calidade do Aire (ICA), que elabora Meteogalicia, para o 15 de xuño, no que se observa o impacto previsto pola entrada de aire cálido norteafricano.

Ademais, Meteogalicia realiza un aviso amarelo por tormentas en boa parte desa metade oriental. A partir das 18 horas, prevense chuvascos intensos e probabilidade de  sarabiada.

A maiores, a xornada estará de novo marcada polas elevadas temperaturas. Hai aviso amarelo por temperaturas superiores a 36 graos nas comarcas ourensás, ademais de temperaturas por enribaa de 34 graos na zona do Miño ao seu paso polas comarcas pontevedresas.

Na terza feira, o concello de Vilamartín de Valdeorras alcanzou a máxima da Galiza, con 38,3 graos, ás 18.10 horas. Seguíronlle Ribas de Sil, con 36,6 graos, e Verín, con 36 graos.

Segunda calixe do ano

A mediados de marzo deste ano O temporal Celia, que arrastrou area do deserto do Sahara até a Galiza, provocou un empeoramento xeralizado da calidade do aire nos concellos galegos, que nalgúns puntos chegou incluso a rexistrar niveis "de emerxencia".

Segundo as estacións de medición da calidade do aire instaladas por Meteogaliza, a calidade do aire foi '"regular" en 16,7% do país e "mala" en 9,5%. A estación de Lalín e a de Cementos Cosmos en Sarria miden unha calidade "moi mala", pero é na de Laza na que se rexistra a peor situación, cunha calidade do aire "pésima" que recomenda medidas "de emerxencia".