Achan un cadáver na ría de Vigo após atopar un vehículo estacionado, sen ninguén dentro, en Rande

Varios medios foron mobilizados nas últimas horas para localizar un home na contorna da ponte de Rande, entre Moaña e Vigo. Os equipos de emerxencias foron alertados da presenza dun vehículo parado na infraestrutura, nun dos carrís sentido Vigo, sen ninguén dentro, o que provocou a alarma.

Desta maneira, a central de emerxencias do 112-Galiza, que recibiu o aviso pasadas as 4.30 horas desta madrugada, activou un dispositivo que incluíu profesionais sanitarios do 061, Salvamento Marítimo, coa embarcación Salvamar Mirach; Gardacostas da Galiza, que participou co helicóptero de rescate Pesca I; axentes da Garda Civil de Tráfico e da Garda Civil, que desprazaron até o lugar unha lancha de rescate; a Policía Local de Moaña, e os operarios de conservación da autoestrada AP-9, que transcorre pola ponte.

Tras varias horas de procura, á primeira hora da mañá desta quinta feira outro particular contactaba co 112-Galiza para informar do achado do corpo dun home flotando nas proximidades da ponte de Rande. Finalmente, os servizos de emerxencias procederon á recuperación do corpo e as autoridades policiais xa investigan a identidade da persoa e as causas do suceso.