Sobe o número de contaxiados, de casos activos e o índice de positividade
Os novos casos de COVID detectados na Galiza repuntaron nas últimas horas até os 521 (fronte aos 327 casos novos notificados hai un día), coas áreas sanitarias da Coruña e Vigo á cabeza de novos contaxios.
Segundo os datos publicados hoxe pola Consellaría de Sanidade, que se corresponden coa información recollida até as 18:00 horas da terza feira, na Galiza hai 8.638 casos activos de coronavirus, 21 máis que o día anterior; e detectáronse por PCR 521 novos contaxios, 194 máis na terza feira.
Este aumento de novos contaxios débese, fundamentalmente, aos casos detectados nas áreas de Vigo e A Coruña. Así, na área sanitaria olívica, confirmáronse 246 novos casos confirmados con PCR, fronte aos 43 detectados o día anterior; de maneira que o número de casos activos ascende de 2.209 a 2.293.
Na área da Coruña e Cee tamén aumentaron os casos, aínda que non de forma tan acusada. Así, o número de persoas con COVID pasou de 1.759 a 1.766, e nas últimas 24 horas detectáronse 100 casos novos (fronte aos 53 novos contaxios detectados por PCR o día anterior).
Na área de Ourense, Verín e Valdeorras, notificouse unha lixeira subida no número de novos casos (de 21 a 27 contaxios detectados), aínda que baixan os casos activos, de 627 a 608.
No resto de áreas sanitarias da Galiza descenden tanto o número de novos contaxios como o total de casos activos. Así, na área de Pontevedra e O Salnés, hai 1.218 casos activos de COVID (17 menos) e detectáronse 48 contaxios (22 menos que o día anterior).
Na área sanitaria de Ferrol, hai 689 casos activos (8 menos) e confirmáronse 19 novos contaxios (9 menos); na área de Santiago e Barbanza, hai 962 casos activos (20 menos) e detectáronse por PCR 44 novos contaxios (8 menos); e na área de Lugo, Monforte e A Mariña os casos activos baixaron a 1.102 (6 menos) e detectáronse 37 contaxios (23 menos).
Sanidade informou tamén hoxe da realización de 6.731 novas PCR en toda Galiza e 1.173 novas probas serolóxicas.
Con respecto á porcentaxe de PCR con resultado positivo, incrementouse lixeiramente nas últimas 24 horas, até o 8,1 %, algo máis de tres puntos por encima da porcentaxe que marca a OMS para considerar que a pandemia está controlada.
O número de falecidos ascende a 1.170.