Atención á diversidade, un dereito do alumnado

Aescola é o medio de socialización por excelencia, polo que é importante que o alumnado cara ao que se dirixe o tratamento da diversidade, se for posíbel, acuda aos centros e estea na aula co resto da rapazada. Viven en sociedade e o noso deber compartido é preparalas para que o poidan facer integradas e non contribuír a mantelas nunha illa. Por esta razón, pola integración, as e os prefesionais da pedagoxía terapéutica entran na aula ordinaria. Cantas horas de apoio reciben á semana? De que depende o número de profesorado de PT (Pedagoxía Terapéutica) ou AL (Audición e Linguaxe) que hai en cada centro? A miúdo, son profesorado non definitivo. Cumpren uns criterios claros e ese número debería depender directamente da cantidade de alumnado con necesidades educativas. Ademais, sería moi positivo que fosen definitivos no centro para poder traballar co alumnado varios cursos. En primaria en ocasións limítase a atención de AL e PT a aquel alumnado que non pode pagar eses servizos fóra da escola, debido á falta de persoal. Ademais, debido á falta de profesorado, nalgúns centros un especialista de PT atende alumnado de varios cursos ao mesmo tempo, polo que non é posíbel que entre nas aulas e, polo tanto, colabore na inclusión. Cando isto ocorre nos centros de secundaria é aínda máis grave porque está a chegar alumnado que non sabe ler nin escribir. Que é atender á diversidade na aula? Só atender ao alumnado que leve un desfase curricular moi grande con adaptación curricular significativa (AC)? Dada a imposibilidade dunha única persoa docente de atender 30 rapaces e rapazas con distintas necesidades, vémonos obrigados a traballar as adaptacións curriculares mediante fichas. Catro horas de atención de PT fóra da aula son claramente insuficientes. A coordinación entre o profesorado é prioritaria. Se a profesora de apoio entra na aula, pode axudar o alumnado a participar, na medida do posíbel, na sesión, a ter unha experiencia semellante á do resto do alumnado presente na sala. Unha das medidas que debería adoptarse é a flexibilidade no traballo do profesorado de pedagoxía terapéutica. En principio, a docencia dentro da aula é a medida a adoptar, mais dependendo do traballo feito, podería permitirse saír da aula. Hai moitos aspectos organizativos que están na nosa man: agrupar as materias que se desenvolven na mesma lingua para permitir usar a lingua como instrumento e a materia como motivo para ler e escribir. Deste modo, se a unha sesión de lingua galega lle segue unha de ciencias, o alumnado con necesidades educativas pode continuar lendo e escribindo sen un corte artificial. Tamén se poderían organizar algunhas materias en bloques de dúas sesións seguidas co grupo para poder dispor de tempo suficiente para organizar tarefas, actividades grupais, cambios,... sen sentir que non hai tempo para certos despregues organizativos. Un mellor tratamento da diversidade pasaría por cambiar estruturas e reorganización dos contidos, metodoloxia, e o horario do alumnado Previo a estas medidas, temos que aclarar unha cuestión. A que materias se lle presta apoio? É unha pregunta que pode parecer estraña, as persoas queremos desempeñar o noso papel en todos os ámbitos posíbeis dentro da sociedade. Porén, nos centros educativos, non hai máis remedio que priorizar porque non hai persoal, polo que o profesorado de PT apoia, xeralmente, as materias instrumentais. Isto fai que a aprendizaxe nas materias do ámbito das ciencias sociais, naturais, as artes e a actividade física queden abandonadas. E xustamente en moitas ocasións son estas materias e actividades máis abertas e participativas, onde este alumnado atopa grandes dificultades. Dependendo do alumnado e do que se vai facer en cada materia, tamén se podería deseñar un plan de atención á diversidade que non fose tan ríxido e permitir que cambiase cando fose necesario. Globalicemos onde se pode. Relacionemos as materias por ámbitos para que o alumnado con diversidade non estea tan perdido. Un mellor tratamento da diversidade pasaría por cambiar estruturas e reorganización dos contidos, metodoloxia, e o horario fraccionado do alumnado. Evidentemente estes cambios suporían tamén a contratación de profesorado especialista e que dentro do horario houbese reunións de coordinación de todas as persoas que interveñen na integración do alumnado. A distribución de horarios en Primaria vai en contra da atención á diversidade. Aumenta o número de alumnado na pública pero non os recursos. Organízase o ensino o mellor posíbel co profesorado especialista que conceden. A atención á diversidade é un dereito do alumnado.