Así soa a voz de Castelao: O Consello da Cultura Galega publica o único documento sonoro conservado da voz do rianxeiro
Trátase da mensaxe que Castelao gravou en fonopostal na Central de Correos de Bos Aires, con motivo da estrea de Os vellos non deben de namorarse.
O Consello da Cultura Galega (CCG) publicou na súa páxina web o único documento sonoro conservado de Alfonso Daniel Rodríguez Castelao (Rianxo, 1886 — Bos Aires, 1950).
Segundo informou o CCG nun comunicado, é a mensaxe que Castelao gravou en fonopostal na Central de Correos de Bos Aires, con motivo da estrea de Os vellos non deben de namorarse, no Teatro Solís de Montevideo o 8 de outubro de 1941 á que o non podía asistir.
Desta forma, esa gravación foi dixitalizada en decembro de 2024 e é, até o momento, o único rexistro coñecido da voz de Castelao.
"Apenas separados por un tabique non estou presente. Xa sei que as creacións do espírito non se adaptan á fronteira da nación e que as obras de arte voan como os paxaros por encima das fronteiras", comeza a gravación de Castelao que se fixo nun disco de lousa para a presentación de Os vellos non deben de namorarse en Montevideo.
Na mensaxe reivindica que as obras de arte levan impresas un selo dunha nacionalidade e define que "foi imaxinada para para a regalía do pobo galego".
A peza está acompañada dun texto do profesor do conservatorio superior de música de Vigo e membro do Arquivo Sonoro da Galiza Xaime Estévez, que explica e contextualiza as fotopostais, que caracteriza como un "curioso procedemento" promovido polo servizo de correos arxentino daquela época.