Arde unha casa abandonada en Carral na que había dúas persoas que resultaron ilesas
23 de xuño de 2023 (10:02 h.)
O inmóbel quedou consumido totalmente polas lapas.
Efectivos do servizo de Bombeiros sufocaron o incendio declarado nunha casa abandonada de Carral (comarca da Coruña) na que, no momento de iniciarse o lume, había dúas persoas que lograron saír ilesas. O suceso tivo lugar minutos antes das 21 horas desta quinta feira nunha vivenda situada na estrada N-550 na zona de Tabeaio, segundo informou a central de emerxencias do 112-Galiza esta sexta.
Até o lugar mobilizáronse os Bombeiros de Ordes e Arteixo, que lograron controlar as chamas contra as 22 horas e sufocar o incendio unha hora máis tarde. O inmóbel, de dúas plantas e construído no seu interior de madeira, ardeu por completo. A zona quedou balizada para evitar situacións de risco.