O arcebispo de Compostela di que a pederastia "non é unha cuestión da Igrexa, senón social"

O arcebispo de Santiago de Compostela, Julián Barrio, asegurou esta sexta feira que as propostas para crear comisións de investigación no seo do Congreso e máis o Defensor do Pobo sobre os abusos sexuais é "ben recibida" por parte da Igrexa, no marco da súa "colaboración leal" co Estado. "Iso si, respectando o ordenamento xurídico e o que tantas veces dixemos e insistimos: sen privilexios mais sen discriminacións", matizou a continuación. Durante a quenda de preguntas na rolda de prensa da presentación do Encontro de Empresarios Católicos, un evento que terá lugar na capital galega do 31 de marzo ao 1 de abril, o arcebispo denunciou que "hoxe se pretende identificar abusos con Igrexa", o que pon "baixo sospeita ás institucións eclesiásticas". "Por desgraza, a pederastia non é unha cuestión da Igrexa, é unha cuestión social. E digo isto non como escusa, senón como unha realidade que hai que ter en conta", dixo a continuación Barrio, debido a que "só un caso xa sería suficiente" para "a necesidade de pedir perdón e atender" as vítimas. Neste senso, Barrio lembrou que a Diocese de Santiago, igual que o resto, contan cun departamento no cal "todas aquelas persoas que padecesen estes abusos" poden presentar "a denuncia correspondente", tras o cal se activa "un protocolo xa perfilado e que xa está en práctica". Barrio, "disposto a escoitar" O arcebispo compostelán apelou a que "isto nunca volva repetirse" e garantiu que a Igrexa considera que "só un caso" xa é "motivo non unicamente para pedir perdón, senón para tratar de acompañar a esta posíbel vítima non só legalmente e psicoloxicamente, senón con todo aquilo que puidese axudarlle". "Eu mesmo manifestei outras veces que estou disposto a escoitar a todas as posíbeis vítimas que, dunha ou outra maneira, sintan a posibilidade de ser escoitadas e axudadas", proseguiu. Abusos en La Salle Concretamente, Barrio foi preguntado polos casos concretos de abusos sexuais ocorridos nos anos 70 e 80 que o colexio La Salle anunciou o pasado sábado que investigaba após recibir novas denuncias. Dous deles rexistráronse na Galiza —teñen centros en Compostela e Ferrol— e o terceiro, en Castela e León. A respecto diso non respondeu o arcebispo senón o seu auxiliar, Francisco José Prieto, quen non se referiu ás denuncias que nos últimos días están a saír á luz sobre o centro da capital galega, senón que se limitou a lembrar que a Arquidiocese ten unha oficina de coordinación de atención ao menor. Así, Prieto defendeu que se procede "conforme a unha serie de protocolos" que son "moi exixentes" e que prevén unha "responsabilidade de aproximación cara ás vítimas" e "de perdón", así como de "buscar esa xustiza e esa verdade" que axude a "facer fronte a unha secuela presente nesta sociedade, mais que tamén afectou á Igrexa". Posteriormente, ao volver ser preguntado sobre os supostos abusos no colexio La Salle, o auxiliar do arcebispo apuntou que quen procede a investigalos son os "superiores da congregación", que xa "procederon a iso". Segundo afirmou, os protocolos estabelecidos non só son preventivos, senón que "tamén axudan a esa escoita das vítimas, a porse en contacto con elas e a proceder sempre á investigación dos feitos". Todo iso, engadiu Prieto, "sempre coa discreción debida" e con "respecto á vítima en primeiro lugar", debido a que "ás veces" esta investigación "pode estar incursa no ámbito civil".