O Supremo reduce un grao as condenas a Antom Santos e María Osorio. Santos podería ficar libre en maio
O TS non aplica esa rebaixa a Roberto Fialhega, ‘Teto’, embora un voto particular dun maxistrado do Tribunal, Luciano Varela, si defende que se lle aplique a redución.
O Tribunal Supremo reduce a condena imposta aos presos independentistas Antom Santos e María Osorio a cinco anos e catro meses de cárcere, nunha decisión que abriría as portas a que Antom Santos saíse en liberdade nunhas poucas semanas, no vindeiro 2 de maio, por ter cumprida a pena, segundo cálculos da familia. María Osorio tería que agardar uns meses máis para a súa posta en liberdade xa que estivo por volta dun ano en liberdade provisoria antes do xuízo.
Non aplicaron esta redución a Roberto Fialhega. Porén, na sentenza hai o voto particular dun maxistrado, Luciano Varela, partidario de que así se faga. Isto, explica Manuel Quintás, abre a porta a que se considere a posibilidade de interpoñer un recurso de amparo ante o Tribunal Constitucional, se ben esta decisión aínda non está tomada.
Non é a primeira vez que o TS reduce a condena a presos independentistas galegos. En abril de 2014 rebaixou a Antom Santos e María Osorio a pena de 10 anos a 7 anos e 9 meses (que agora rebaixa de novo, desta vez a 5 anos e 4 meses). A Roberto Fialhega e Eduardo Vigo rebaixoulla naquela altura de 18 anos de cárcere a 13 anos e 9 meses.