Agua e sal: apoio desde Galiza á greve de fame dos presos palestinos
Concentración ás portas do Parlamento de Galiza en apoio aos prisioneiros palestinos. As concentradas levaban auga e sal, o único que estes presos inxiren e que se converteron en símbolos do apoio aos centos de prisioneiros que manteñen a greve desde hai case un mes.
Máis de 1.200 presos políticos palestinos iniciaron o pasado 17 de abril unha greve de fame indefinida nos cárceres israelís, consumindo unicamente auga e sal para demandar melloras nas prisións e a fin da política de isolamento e quebrantamento aplicada a este colectivo polo estado de Israel. Impulsada polo carismático Marwan Barguti, preso condenado a cadea perpetua e coñecido como o ‘Mandela palestino’, a greve está a recoller mostras de apoio e solidariedade desde diferentes partes do mundo. Primeiramente, desde Palestina, onde en moitos fogares algúns dos seus membros se sumaron a esta greve de fame. E onde até algúns restaurantes substituíron os seus menús por auga e sal, en símbolo de apoio aos prisioneiros.
Na tarde desta terza feira, auga e sal estiveron presentes nas portas do parlamento de Galiza. Unha concentración convocada por BDS-Galiza en apoio e solidariedade cos presos políticos e a súa loita nas prisións. Entre os concentrados, deputados do BNG e de En Marea.
As demandas básicas dos presos palestinos resúmense en catro puntos: a fin do isolamento e detención administrativa sen cargos nin xuízos; a mellora da atención sanitaria; restablecemento de visitas familiares regulares, e permiso de entrada de libros e xornais.
Segundo a organización Addamir, hai uns 6.300 presos palestinos, entre os que están 500 en situación de detención ‘administrativa’, 300 menores de idade, 13 parlamentarios e 28 xornalistas. Por volta de 1.000 desas persoas presas teñen prohibidor ecibir visitas por “motivos de seguridade” e perto de 20 permanecen en isolamento absoluto. Desde 1968 máis de 800.000 palestinos foron detidos polas forzas israelís.