ADOS chama a comunidade universitaria a doar sangue

A Axencia de Doazón de Órganos e Sangue (ADOS) desenvolverá no transcurso da terza e cuarta feiras os dous últimos días da segunda fase de campaña de doazón de sangue nas universidades galegas do curso académico 2023-24.

Nestas dúas últimas xornadas, denominadas “Campaña Escoba”, as unidades móbiles de ADOS visitaran os distintos campus das universidades galegas para que a comunidade universitaria que aínda non doou sangue, pero teña a intención de facelo, poida participar.

Esta segunda fase comezou o pasado 27 de febreiro e rematará o 17 de abril, tendo como obxectivo o fomento da doazón entre o estudantado universitario, renovar a base de doantes e superar as 2.234 doazóns recollidas na primeira fase do presente curso académico.

ADOS fai así un chamamento á comunidade universitaria para que participe nestes dous últimos días da segunda fase da campaña universitaria de doazón de sangue. Para iso, lembra que as unidades móbiles da axencia desprazaranse nestes dous días aos campus das tres universidades públicas galegas.

Así, na terza feira será posíbel doar na Escola de Arquitectura Técnica da Coruña e na Facultade de Medicina de Compostela. Na cuarta feira, as unidades móbiles da ADOS desprazaranse até as facultades de Enfermaría e Podoloxía de Ferrol, Socioloxía na Coruña, Dereito en Compostela e Comercio en Vigo, ademais de ás escolas de Forestais de Pontevedra e Enxeñaría Industrial de Vigo. Visitarán tamén a Biblioteca Intercentros de Lugo e o Edificio Facultades de Ourense.

A axencia recorda, ademais, a importancia que ten o desenvolvemento das campañas de doazón no eido educativo, tanto en centros de ensino non universitarios como universitarios xa que, para moitos mozas e mozas “é o primeiro contacto que teñen co xeneroso xesto da doazón de sangue”.