Adegas Terra de Asorei, viño do val do Salnés

Adegas Terra de Asorei é unha empresa familiar do século XXI que elabora albariño no Val do Salnés, dentro da Denominación de Orixe Rías Baixas. É unha empresa de capital galego que a día de hoxe vende os seus albariños en 22 países, apostando por elaboracións tradicionais, fieis e leais ás terras do Val do Salnés, etiquetando sempre en galego e presentando unha importante gama de elaboracións especiais, moi interesantes de descubrir. A súa aposta é a calidade, ademais dos controis do Consello sométense a auditorías externas das Normas ISO ao igual que as do selo Galicia Calidade. Os socios de Adegas Terra de Asorei naceron como pequenas adegas familiares, que senten o seu berce e orixe na Festa do Albariño, que comezou a celebrase en Cambados no ano 1953. Xa elaboraban albariño antes de que se creara a Denominación de Orixe Rías Baixas, da cal forman parte desde os seus comezos nos anos 80, participando na "revolución agraria no Salnés". Xa a finais dos anos 90, sentíronse esquecidos polo Consello Regulador, a Consellaría de Medio Rural e a Xunta. Eran tempos en que grandes empresas e fondos financeiros ou "amigos do poder" tiñan "alfombra vermella" para entrar no sector do albariño nas Rías Baixas. Eles resistían no mercado local e galego porque os seus albariños eran recoñecidos pola calidade, lealdade á terra e vendían todas as colleitas, pero vían que tiñan dificultades para medrar de modo normal no mercado. Non contaban con apoios de ninguén. As propostas do "grupo rebelde" Querían exercer o seu dereito a existir, a ter futuro no albariño. Manifestaban o seu dereito a ser escoitados, a pór en debate o modelo cara a onde podía ir o albariño, ofrecer as súas propostas e iso levounos a participar nas eleccións do Consello Regulador, formando a candidatura Adegas Libres do Salnés. O seu representante foi o xornalista Xosé Ramón Durán (Roque Durán), sendo o primeiro adegueiro elixido no Consello en votación electoral en urna, pois durante case 15 anos eran designados en reunións fechadas previas ás eleccións. Nos comezos do novo milenio, sacan adiante iniciativas como un informe anual e follas informativas do Consello Regulador e organizan a cata de viños de garda, para os albariños de máis de dous anos, pois era unha maneira de pór en valor unha tradición de elaborar o albariño no Salnés. Eran o "grupo rebelde". Tras a súa estancia no Consello Regulador e ver que as cousas non mudaron moito nin eran escoitados, decidiron dar un chanzo e manter a súa "rebeldía" levando á práctica algún dos seus modelos de como entender o desenvolvemento do albariño e as empresas familiares. Nun momento en que se crea o euro, desenvólvese a globalización, grandes capitais doutra orixe (construtoras, bancos, fondos de investimentos...) entran na agricultura. Este grupo de adegas do Salnés comeza a reflexionar conxuntamente (baixo o lema de Antón Reixa 'Estamos en guerra hai que reflexionar' e chegan á conclusión de transformar a asociación Adegas Libres do Salnés, no seu propio modelo para sobrevivir: a Agrupación de Interese Económico Terra de Asorei. Executar, levar á práctica o que pensaban que era mellor: non perder o control das súas adegas, dos seus viñedos e ser felices mantendo a súa proposta e idea de elaborar un albariño leal ao saber facer no Val do Salnés, xerar riqueza na terra, axudar a favorecer a remuda xeracional e poder competir no mercado. Reflexionar e irmandade O encargado de liderar este proxecto foi Roque Durán, que formaba parte do grupo que viviu en primeira persoa o nacemento desde Cambados da Denominación de Orixe Rías Baixas. En 1989, xa tiña o albariño Vento Mareiro, unha reivindicación do propio, froito do pequeno adegueiro que busca algo diferente. Mais, nesa reflexión conxunta, ademais de ver chegar a crise económica de 2008, como emprendedor entendeu que para manterse no futuro cun proxecto empresarial independente desde Galiza, era necesario xerar a unión dun grupo empresas (familiares ou resultado dun proxecto persoal) xurdindo así entre 2007 e 2008 o proxecto AIE Terras de Asorei, un traballo común que apostaba pola profesionalización e calidade do viño. Comezaron a elaborar e comercializar conxuntamente o seu viño baixo a marca 'Terra de Asorei', grazas a acceder a unhas axudas da Consellaría de Medio Rural. Comezaron a vender e medraron as súas vendas. Mentres, seguen reflexionando en grupo e crearon o 'Foro do Albariño', para falar desde o punto social, económico e cultural do viño (hoxe séguese organizando ademais como curso de Verán da Universidade de Santiago de Compostela). Pero eran tempos moi difíciles, en plena crise económica deciden buscar novos mercados no exterior: a internacionalización de Terra de Asorei comeza en 2011 con vendas en Alemaña, Estados Unidos e no Xapón. Fixeron a súa irmandade e unión de adegas sen axudas de ningún tipo e cunha estratexia que denominaron "a pan de millo", aproveitando ao máximo os recursos que tiñan: viñedos, coñecemento e mesma filosofía de elaboración e tradición na comercialización do albariño desde o Val do Salnés. Nunha situación de crise e incertezas (2012-2015), a súa estratexia de crear a irmandade adegueira Terra de Asorei fainos medrar. De viticultores e adegueiros a un Consello de Administración No Foro do Albariño de 2015 "xa nos fan a segunda proposta de mercar unha adega para poder elaborar conxuntamente os nosos albariños" lembra Roque Durán. Mercamos a Adega e pasamos de AIE a ser Adegas Terra de Asorei S. L. Era a nosa oportunidade de consolidar o proxecto e dar o paso a ter unha adega que se axeitaba ás nosas necesidades de presente e futuro. Non deixamos de ser viticultores e adegueiros, mais pasamos a ser membros dun Consello de Administración. Xa, daquela, tiñamos clara a nosa estratexia: ser unha empresa de capital galego, familiar, unha adega que aposta pola calidade, que responde á súa base territorial e ser unha pequena adega no mercado internacional. "Queremos que os nosos albariños comuniquen a orixe, a esencia da nosa paisaxe e a cultura galega polo mundo" afirma o fundador e presidente conselleiro delegado de Terra Asorei, Roque Durán. A decisión e o empuxe de Roque Durán, xunto cos seus cinco socios, permitiu converter Adegas Terra de Asorei nun gran proxecto común, partindo da súa tradición como viticultores que traballan unhas 50 hectáreas no Val do Salnés. O seu modelo de entender a empresa e a elaboración dun viño de calidade e o seu compromiso coa terra fainos diferentes. A día de hoxe, Adegas Terra de Asorei conta cunha capacidade de elaborar mais de 300.000 botellas. E nos últimos anos, pese á crise, a pandemia e a situación actual de incerteza global económica, conseguiron chegar a uns 22 Estados. No mercado internacional venden máis do 60%. E seguen medrando dun modo sostible.