A veciñanza contra a mina de cobre
A empresa quere explotar unha mina a ceo aberto, de case 700 hectáreas, para extraer cobre de forma intensiva, día e noite, durante os próximos quince anos. Miles de veciñas e veciños opóñense a que se retome a actividade mineira, que deixou no pasado unha importante pegada ecolóxica na zona aínda sen resolver e que ameaza o futuro da comarca. Hai convocada para este domingo, día 25, unha manifestación-tractorada no Concello de Touro. Eis un extracto da reportaxe publicada no Sermos Galiza 285.
“O que non recuperaron en máis de trinta anos, din que van facelo agora nun ano, unha vez remate a explotación. É dicir, destruíndo durante quince anos máis, para logo non facer nada”, apunta a presidenta da Plataforma Veciñal Mina Touro-O Pino NON, Isabel García. Para o colectivo, non existe ningún beneficio en reabrir a mina, na que se prevé o duplo de actividade que na etapa anterior, entre os anos 1973 e 1986. Un pasado que non esquecen, porque segue presente nas súas vidas. Varios estudos científicos, algúns financiados pola propia Xunta, confirman que as drenaxes ácidas e as verteduras teñen afectado as augas do Ulla a través de afluentes contaminados polos restos da actividade mineira, e que desembocan na ría de Arousa. O último incidente tivo lugar só hai un días polo desbordamento dunha balsa da mina, segundo denunciou a Asociación Aldea Viva.
[Podes ler a reportaxe íntegra no número 285 de Sermos Galiza, á venda na loxa e nos quiosques]