687 novos positivos levan Galiza a cifras récord
Supera en 24 horas os 516 detectados na xornada do 29 de marzo e tamén a barreira dos 6.000 casos activos.
Nas últimas 24 horas, os positivos por COVID-19 detectados na Galiza creceron até os 687, o que supón o récord de toda a pandemia, xa que o anterior máximo estaba fixado en 516 o 29 de marzo. Ademais, os casos activos superan xa os 6.000.
Segundo as cifras da Consellería de Sanidade con datos solicitados até as 18,00 horas do venres, a área sanitaria da Coruña e Cee rexistrou 135 infeccións fronte ás 92 da xornada anterior, mentres que a de Vigo sumou 125 positivos, o que case duplica os 64 dun día antes.
Tamén rexistraron importantes subidas as áreas sanitarias de Ferrol, con 90 novas PCR positivas (32 máis); a de Lugo, con 84 contaxios detectados (38 máis); e a de Ourense, que con 83 (soben en 19) pasa a ser a segunda con menos casos rexistrados.
Pola súa banda, a área de Santiago-Barbanza anotou un descenso neste último parte, até os 118 positivos diarios (-13), e Pontevedra-O Salnés, que tamén baixou, está á cola con 52 novos contaxios (-7).
En canto ás altas, nas últimas 24 horas curáronse 397 persoas do coronavirus, o que coloca o total desde o inicio da pandemia en 24.970. Ademais, até o momento faleceron 859 persoas diagnosticadas de COVID-19 na Comunidade, tras engadir ao cómputo as últimas tres vítimas notificadas na tarde do venres.
Deste xeito, a cifra de casos activos de coronavirus sitúase este sábado en 6.170, o que supón 290 menos que un día atrás. A área sanitaria que máis pacientes concentra é a de Ourense-Verín-O Barco, con 1.319 persoas diagnosticadas de COVID (+130), seguida da de Vigo, con 1.097 (+93); A Coruña-Cee, con 1.057 (+93); e Santiago-Barbanza, con 1.047 pacientes (+64).
En Lugo-A Mariña-Monforte, hai 616 casos activos (+61), en Pontevedra-O Salnés, 622 (+27), e en Ferrol, 412 (+83).
PCR realizadas
Así mesmo, segundo os datos actualizados este sábado por Sanidade, até a data realizáronse na Galiza un total de 625.004 PCR, o que implica que en 24 horas se fixeron 8.707 probas. De todas elas, 8,3% arroxou un resultado positivo, unha cifra por encima do 5% que marca a Organización Mundial da Saúde.
Todas as áreas sanitarias exceden este limiar, pero a de Ferrol é a que máis destaca, cunha positividade de 15,3%. Tras esta, están Lugo (8,7%), Vigo (8,6%), A Coruña (8%), Santiago (7,9%), Ourense (7,1%) e Pontevedra (6%).