100.000 sinaturas pola abolición das touradas en Galiza
Galiza Mellor sen Touradas rexistrou no Parlamento as máis de 100.000 firmas recollidas dende comezos de ano e apuntou a posibilidade de presentar unha ILP (Iniciativa Lexislativa Popular) en termos semellantes á redactada no territorio catalán.
Na mañá desta sexta feira tivo lugar no Parlamento galego a entrega de máis de 100.000 sinaturas contra as touradas por parte da Plataforma Galiza Mellor Sen Touradas (GMST) e a Fundation Franz Weber. En rolda de prensa aprensentouse a 'Iniciativa Europea pola Abolición”, participando na mesma o voceiro dos abolicionistas, Rubén Pérez, acompañado polos deputados Ana Pontón (BNG), Antón Sánchez (AGE) e Patricia Vilán (PSOE)
Rubén Pérez lembrou a nula lexitimidade que teñen os defensores das touradas, que “só representarían o 0,8% da poboación”. Pola contra os milleiros de sinaturas e o apoio explícito de 26 deputad@s que conformaron a comezos de ano a chamada Fronte Antitaurina exercerán “un contra-poder e unha reivindicación de veto dos festexos taurinos que na actualidade, tal e como afirmou o voceiro, son unha excepción na Lei 1/93 de Protección dos Animais”.
A prioridade dos colectivos abolicionistas é trasladar o debate á axenda parlamentar, indicou Pérez, que mesmo anunciou a posibilidade de presentar unha ILP (Iniciativa Lexislativa Popular) en termos semellantes á redactada no territorio catalán.