Volve a crise ao PP de Vigo, que fica en mans dunha xestora

Unha xestora farase cargo da dirección do PP de Vigo "non máis tarde do 29 de febreiro" tras a saída de Marta Fernández-Tapias da política institucional. A que foi candidata do Partido Popular á Alcaldía de Vigo nas eleccións locais do pasado mes de maio, voceira do PP na cidade e vicepresidenta da Deputación de Pontevedra confirmou o pasado 2 de febreiro nas súas redes sociais que, iniciará "unha nova etapa" após os comicios galegos do 18 de febreiro.

Fernández-Tapias aspirou á Presidencia da Deputación de Pontevedra após as pasadas eleccións locais e postulouse como candidata fronte ao actual mandatario, Luís López 'Lugués', que logrou o cargo grazas ao apoio dos rexedores do Deza, O Salnés e O Condado.

Naquela batalla, Fernández-Tapias contaba co apoio do aparato do partido e do propio presidente da Xunta da Galiza, Alfonso Rueda, de cuxo círculo próximo fai parte desde hai moitos anos a aínda voceira do Partido Popular vigués. Precisamente, o papel de Rueda foi determinante para que Fernández-Tapias lograse o nomeamento de candidata na cidade olívica, no marco dun conflitivo proceso de primarias que a confrontou ao daquela senador Javier Guerra.

Escenario postelectoral

A renuncia de Marta Fernández-Tapias faise efectiva cando o Partido Popular vén de sufrir unha derrota en Vigo nas eleccións galegas do pasado domingo. Así, os populares, que lograron 54.010 votos e unha porcentaxe superior ao 35%, víronse superados polo BNG, que alcanzou 56.820 sufraxios, cun 37% dos apoios e rexistrou un aumento de case 14 puntos en relación ao proceso electoral de hai catro anos. Pola súa parte, o PSdeG, que goberna a cidade, situouse en 30.781 votos, tras deixarse 12.580 apoios e ficar nunha porcentaxe do 20%.