As vítimas do Alvia reclaman investigar as causas do sinistro

O 26 de xullo de 2024 coñecíase a sentenza do accidente ferroviario do tren Alvia no barrio compostelán de Angrois, que condenaba como únicos responsábeis do sinistro o maquinista do comboio, Francisco José Garzón, e o antigo director de Seguridade do Administrador de Infraestruturas Ferroviarias (Adif), Andrés Cortabitarte –neste caso a condena foi recorrida pola Fiscalía–. Porén, o auto xudicial non convence ao colectivo de vítimas, que continúa reclamando ao Goberno do Estado unha investigación independente que "aclare" o acontecido. As vítimas, que desenvolveron esta cuarta feira un acto íntimo para lembrar as persoas falecidas no sinistro, destacaron as "contradicións" dos informes sobre a causas do sinistro elaborados polas autoridades españolas, que os responsábeis comunitarios cuestionaron en diferentes relatorios. A este respecto, a Axencia Ferroviaria Europea (AFE), nunha auditoría redactada en 2018, sinalou que, "contrariamente ás técnicas de supervisión estabelecidas no marco xurídico, a autoridade de seguridade española non parece seguir a metodoloxía obrigatoria exixida pola lexislación". O relatorio da AFE, organismo da Comisión Europea encargado de velar pola seguridade e a operatividade ferroviaria na Unión Europea, concluíu que o Estado español "está a incumprir" o disposto pola lexislación comunitaria en materia de seguridade ferroviaria. A este respecto, sinalou que o Goberno estatal "non está aplicando" a normativa recollida na Directiva 2004/49/CE, de 29 de abril de 2024, sobre a seguridade dos ferrocarrís. Neste punto, afirmou que “considera motivo de preocupación o feito de que os sistemas de xestión da seguridade de diversas empresas do sector ferroviario en España non se empreguen como principal instrumento para o control de riscos". A ollada das vítimas está posta agora na xustiza comunitaria. O pasado 17 de febreiro o Tribunal Europeo de Dereitos Humanos aceptou a trámite unha denuncia para obrigar o Estado español a realizar unha investigación independente sobre as causas do sinistro. "Solicitabamos que se levase a cabo unha nova investigación independente que cumprise cos requisitos legalmente estabelecidos: o trámite de audiencia ás vítimas e que atendese as graves deficiencias sinaladas pola Comisión Europea no informe da Axencia Ferroviaria Europea", destacaron esta cuarta feira as vítimas. José Blanco e Ana Pastor 2025 será o primeiro ano após o sinistro de Angrois en que o colectivo de vítimas non se mobilice na rúas da capital da Galiza en demanda de xustiza. Nesta ocasión convocaron os medios de comunicación a unha rolda de prensa en Compostela para explicar o estado do seu procedemento diante do Tribunal Europeo de Dereitos Humanos e as súas reclamacións. Nesta liña, demandan de novo "responsabilidades políticas" e poñen o foco na actuación desenvolvida polos antigos ministros de Fomento José Blanco (PSOE) e Ana Pastor (PP).