José Tomé dimite como presidente da Deputación de Lugo, deixa o PSOE e manterase como alcalde de Monforte
O xa ex presidente da Deputación de Lugo e ex secretario xeral do PSOE provincial, José Tomé Roca, anunciou esta cuarta feira que, tras solicitar a suspensión cautelar de militancia e renunciar aos seus cargos orgánicos e institucionais no partido, manterá tanto a Alcaldía de Monforte de Lemos como a súa acta na corporación provincial, pasando en ambos ámbitos ao grupo de non adscritos.
Nunha comparecencia pública realizada pola tarde, Tomé explicou que continuará gobernando Monforte como non adscrito ao contar cunha "amplísima maioría absoluta" e por entender que non debe "soportar ningunha mentira nin invento" sobre a súa persoa. No caso da Deputación, onde o PSdeG goberna en coalición co BNG, afirmou que renuncia á Presidencia "para facilitar que o Goberno siga funcionando ben", aínda que conservará o escano provincial.
O ex dirixente socialista asegurou que tomou esta decisión "sen coaccións, voluntariamente" e que só comunicou o movemento ao secretario xeral do PSdeG, José Ramón Gómez Besteiro, e a compañeiros próximos. Subliñou os seus 40 anos de militancia e que foi o seu "amor ao partido" o que o levou a apartarse "para non causar ningún prexuízo".
Tomé insistiu en que as denuncias de acoso son "totalmente falsas", asegurou que non coñece "ningunha denuncia de ningunha muller" e sostivo que todo se orquestrou a partir da emisión televisiva na que se fixeron públicos os feitos. Afirmou que agora "parece que hai unha denuncia feita ás presas", o que, ao seu xuízo, "ten importancia". Avanzou que emprenderá accións xudiciais e que comparecerá na causa para "defender a súa inocencia". "Agora non quero acusar a ninguén", dixo, engadindo que "todo se termina sabendo".
Ao grupo dos non adscritos
O ex mandatario provincial declarou que non teme polo seu futuro político e que "estes boatos" xa os vivira anteriormente. Tamén detallou o calendario inmediato: a suspensión de militancia fai que deixe automaticamente de ser presidente provincial do PSOE, e esta quinta feira formalizará por escrito a súa renuncia á Presidencia da Deputación, mantendo a acta. Aínda non se coñece quen o substituirá, mais prevé que se anuncie esta mesma semana.
Respecto do Concello de Monforte, continuará como alcalde non adscrito, acompañado polo seu equipo de Goberno, que tamén abandonará as siglas socialistas e integrará o grupo de non adscritos. Na Deputación, aclarou, a decisión de seguir ou non no grupo socialista "será voluntaria" para cada deputado ou deputada e coñecerase nos próximos días.