Rego augura que os votos ao BNG serán "chave" para "frear á dereita"

Dispor dun "grupo galego forte" no Congreso após as eleccións do vindeiro 23 de xullo é o obxectivo que ten entre cella e cella o BNG. Isto, en palabras do seu deputado e portavoz na Cámara baixa, Néstor Rego, permitirá "condicionar" o labor de Moncloa en favor da 'Axenda Galega' que abandeira a formación nacionalista.

E nesa listaxe de prioridades incluiranse cuestións como a reversión das concesións administrativas na Xunqueira de Alba e a promoción da súa rexeneración e conservación, "así como do conxunto do litoral de Pontevedra".

Así o adiantou esta cuarta feira Rego nunha visita á cidade do Lérez, acompañado do alcalde e candidato á reelección, Miguel Anxo Fernández Lores, quen destacou o traballo "incansábel" do seu compañeiro de filas desde Madrid: "Non houbo problema nin solución que o BNG non trasladase á Cámara baixa; defendeu os intereses da cidadanía da Galiza e, no concreto, da de Pontevedra".

En relación coa Xunqueira de Alba, Lores salientou que o Bloque xa demandou ao Goberno español, "mediante distintas iniciativas", a recuperación deste espazo. "O Estado debería renunciar de forma voluntaria e anticipada ás concesións que ostenta e proceder á liberación dos terreos co obxectivo de destinalos a crear unha gran zona verde", incidiu.

Pola súa parte, Néstor Rego apuntou que este caso "exemplifica por que é máis preciso que nunca que o BNG conforme un grupo galego forte en Madrid para condicionar as políticas que leve a cabo o Executivo estatal, para demandar a reversión das concesións e a recuperación da zona húmida, pero tamén para reclamar o resto de cuestións na axenda da cidade".

Na mesma liña, pediu o voto para a forza nacionalista: "Os galegos e galegas deben estar certos de que, como xa aconteceu hai catro anos, os votos do BNG serán chave para conseguir que a dereita non goberne no Estado español.