O PSOE lembra que na investidura de Sánchez "Podemos decidiu sumar os seus votos aos do PP"
Hai desxeo, boas palabras, entre o PSOE e Podemos, mais tamén competición por ver quen ocupa o liderado da esquerda española. Na súa estrea como portavoz do grupo socialista, José Luis Ábalos anunciou a abstención do PSOE, agradeceu o "ton" da intervención de Iglesias, mais ao mesmo tempo lembrou que os votos de Podemos se uniron aos do PP na sesión de investidura de Pedro Sánchez en marzo de 2016.
Recolleu José Luis Ábalos a man tendida ao diálogo oferecida por Pablo Iglesias na sesión desta terza feira, mais a cousa ficou aí, sen alimentar ningunha expectativa especial de acordo entre as dúas forzas políticas da esquerda estatal.
Si que se esforzou, en troca, Ábalos en enfatizar que o triunfo da moción de censura non depende dun eventual voto afirmativo do PSOE, que non se vai producir. "Nen aínda que votásemos que si isto vai adiante. Deixen de alimentar a expectativa de que nos xogamos que Rajoy saia. Non poñan excusas. Con que maioría parlamentar goberna vosté? -interpelou Iglesias- Non ve que é inviábel? É un acto falido en orixe e, desde logo, libérenos da responsabilidade. Non é verdade que porque nos absteñamos Rajoy siga", dixo o portavoz socialista.
Ábalos non dubidou en pasar ao ataque ao verbalizar o inevitábel, a alusión ao voto negativo de Podemos en marzo de 2016 á investidura de Sánchez. "Houbo unha grande oportunidade para botar o señor Rajoy e lograr un goberno progresista neste país. Sucedeu no mes de marzo do ano pasado. Entón si daban os números [Sánchez chegara a un acordo con Ciudadanos]. Mais Podemos decidiu sumar os seus votos aos do PP e frustrar a investidura dun presidente socialista. Entón había posibilidade de mudanza e se frustrou. Non poñan máis excusas", alegou.
"A moción non vai prosperar", recapitulou Ábalos, porque, argumentou, aínda que fose apoiada polo PSOE non obtería os votos suficientes (tería 167 votos a favor face os 169 do bloco PP-Cs). En todo caso, o portavoz socialista non utilizou a súa quenda de palabra para desacreditar Pablo Iglesias como candidato, un dado que ilustra as novas relacións que se abren entre as dúas formacións políticas após o retorno de Sánchez ao seu despacho de Ferraz.
Iglesias propón ao PSOE negociar outra moción
Na súa réplica, o candidato á presidencia do Goberno, Pablo Iglesias, ofereceu o seu compromiso de "traballar" co "novo PSOE" por "unha maioría alternativa". E puxo obxectivo a esa tarefa: "Poñámonos a traballar durante o verán para negociar unha moción de censura".
Esa nova moción podería ter como candidato Pedro Sánchez, pois a Constitución española non obriga a ter escano no Parlamento para optar á presidencia do goberno. E de feito durante os últimos días Podemos ten apontado como hipótese a de apoiar un presidenciábel socialista.