O PSdeG recoñece un punto de partida "complexo" en Compostela, mais di traballar por unha candidatura "forte e ilusionante"

A secretaria de Organización e viceportavoz parlamentaria do PSdeG, Lara Méndez, recoñeceu que a súa formación parte dun "punto de partida complexo" en Compostela tras a perda da Alcaldía nas pasadas eleccións locais e a posterior crise no grupo municipal, mais destacou que traballará por unha candidatura "forte e ilusionante" para os comicios de 2027.

Lara Méndez pronunciouse deste modo ao ser preguntada esta segunda feira pola situación do partido na capital galega despois de que a pasada sexta feira as catra concelleiras expulsadas do grupo municipal de Santiago, no que só continúan dúas edís, acudisen á xustiza para frear a súa saída.

Na súa intervención, Méndez destacou que o PSdeG traballará por "candidaturas fortes, ilusionantes", con persoas que teñan un proxecto claro de cidade, mais recoñeceu que o punto de partida "é complexo" porque nas eleccións de 2023 pasouse de "10 concelleiros a seis".

A este punto de partida "complexo", conforme indicou, engadiuse que o grupo municipal viuse reducido tendo en conta que catro concelleiras foron expulsadas "polo incumprimento dos estatutos" do PSOE.

"Por tanto, aí o traballo terá que reforzarse", afirmou para soster que o Partido Socialista debe ser capaz de "conectar coa sociedade" con "candidatos e candidatas", "máis aló da cabeza visíbel", cun proxecto "claro e definido de cidade". Todo iso, indicou, nun contexto no que considera que "hai bastante ausencia" de proxecto por parte do Goberno municipal.

Ademais, preguntada pola renuncia do que fora alcalde de Santiago, Xosé Sánchez Bugallo, á súa acta como senador, Lara Méndez asegurou que a formación respecta "as decisións persoais" e dixo que se trata dunha "renuncia anunciada".

"Xa tiñamos coñecemento do propio Bugallo e tamén de quen o vai a substituír de que isto xa se ía a producir e, por tanto, respecto total e absoluto e agradecemento a todos os compañeiros que durante moitos anos levan traballando moito polo PSOE e sobre todo polo último fin que temos os socialistas, que é mellorar a vida das persoas", sostivo.

Congresos

Na rolda de prensa, ademais, a secretaria de Organización do PSdeG referiuse aos congresos da formación que decorreron na fin de semana nas circunscricións de Lugo e A Coruña, nos que "non só se elixiu unha executiva e un secretario xeral, senón que tamén se marcaron as prioridades do proxecto político".

A tamén responsábel de Organización do PSdeG destacou as palabras do secretario xeral socialista, José Ramón Gómez Besteiro, que do mesmo modo que ela sinalou que no caso de Santiago o futuro do partido pasa por impulsar candidaturas "fortes, competitivas e ilusionantes" para as eleccións municipais de 2027, "mirando cara a adiante mentres o PP segue instalado no non a todo".

Así, Lara Méndez asegurou botar en falta "responsabilidade institucional" por parte da formación popular, algo que, segundo indicou, tradúcese "nun non á suba das pensións, á suba do salario mínimo interprofesional, á xornada laboral de 37,5 horas, ao bono gratuíto para o tren, á rebaixa das peaxes ou ás axudas ás empresas polos aranceis de Trump". No outro extremo, en referencia ao BNG, afirmou "hai un nacionalismo ancorado no século pasado, que non entende a política máis aló dos debates desfasados, como o do soberanismo".