O PSdeG de Narón critica a "foto da vergoña" de dous edís con Laureano Oubiña na Feira do Mel

O portavoz do PSdeG de Narón, Jorge Ulla, criticou a "foto da vergoña" de dous concelleiros do grupo de Goberno de Terra Galega con Laureano Oubiña, que cumpriu condena por narcotráfico, durante a Feira do Mel o pasado 5 de outubro. Os dous edís en cuestón serían Antonio Ramos, que dirixe a área de Servizos, Medio Ambiente e Sanidade, e a concelleira de Estatística, Transporte Público, Feiras e Mercados, Ocio e Festexos, Mar Gómez.

Para Ulla, a imaxe, ademais de ser unha "absoluta falta de sensibilidade e respecto" cara ás vítimas da droga, confirma que "non se pode permitir que se normalicen estas figuras nin que as administracións déanlle pábulo e espazo de promoción".

"Non se trata dunha simple foto casual ou fortuíta. O Concello, a través das súas canles de comunicación institucionais e coa presenza dos seus concelleiros, dáballe un espazo e unha plataforma de publicidade a unha figura emblemática do narcotráfico galego", apuntou o portavoz socialista.

Neste sentido, criticou que o que fixo o goberno de Terra Galega foi "branquear o narcotráfico" mediante a "promoción cultural e política".

Os socialistas apuntaron que esta situación é un "exemplo nefasto" para os mozos do municipio e a "indignación agrávase" cando un dos concelleiros que sae na foto con Oubiña está á fronte da área de Sanidade o Concello.

"É unha absoluta contradición ética que o responsábel municipal de velar pola saúde pública se retrate riseiro cunha persoa cuxa traxectoria está vinculada á destrución da saúde de miles de persoas", esgrimiu Jorge Ulla.

Por todo iso, o Grupo Municipal Socialista presentará unha moción no próximo pleno co obxectivo de "arranxar a imaxe e o dano institucional causado". Así, exixiron aos concelleiros que pidan desculpas públicas á veciñanza e que a alcaldesa reprobe publicamente a actuación dos edís de Terra Galega.

O Goberno de Narón estuda demandar ao PSdeG por falar de "branquear o narcotráfico"

O Goberno municipal de Narón emitiu un comunicado para aclarar e desvincularse da polémica xerada tras a difusión dunha fotografía de dous dos seus concelleiros con Laureano Oubiña, que foi condenado por narcotráfico, nun posto da 'Feira do Mel e Produción Primaria', decorrida o pasado domingo.

O Executivo local respondeu á nota de prensa do PSdeG de Narón, que acusou Terra Galega (TeGa) de "branquear o narcotráfico a través da promoción cultural e política". Nun comunicado, o Goberno municipal de Narón desmente categoricamente as acusacións socialistas e anuncia que estudará as medidas oportunas pola difusión destas "graves acusacións" que, ao seu xuízo, "difúndense a propósito e carecen de veracidade".

Respecto á fotografía, o Goberno municipal asegura que a imaxe foi unha petición privada da persoa que atendía o posto aos dous edís que se atopaban na feira. Explican que, no posterior envío de imaxes do evento para a súa publicación en redes sociais, esa foto "privada" incluíuse por erro, o que derivou na súa difusión nas redes do Concello.

A fotografía foi retirada de inmediato unha vez se ordenou a corrección, ao tratarse dun momento de carácter privado e "en ningún momento para dar publicidade a figura algunha". O posto en cuestión, identificado como Perujito SLU (cunha muller como administradora), foi levado pola empresa adxudicataria dun dos contratos do evento. Ademais, o Executivo local subliña que o mesmo posto estivo presente nos últimos anos en diversas feiras e eventos de distintos concellos tanto da Galiza como de fóra do país.